Fon Monetè Entènasyonal, FMI fè konnen li pap ratifye prè 229 milyon dola li ofri Ayiti toutotan pa gen yon nouvo gouvènman ak yon bidjè palman an apwouve.
Anons sa a fèt nan moman Prezidan Jovenel Moise pibliye dekrè nominasyon Jean Michel Lapin kòm nouvo Premye Minis pou ranplase notè Jean Henry Ceant ke asanble depite a te bay yon vòt non-konfyans.
2 chanm yo gen pou ekri premye minis nonmen an Jean Michel Lapin pou envite l vin prezante enonse politik jeneral li. Pou kounye a kesyon moun ap poze sèke èske premye minis nome a pral jwenn abwobasyon tou 2 chanm yo?
Kèk depite ki te pale nan mikwo Lavwadlamerik fè konnen yo pa gen entansyon vote pou yon premye minis ki te minis nan yon gouvènman chanm depite a te ranvwaye. Nan chanm wot la, Senatè Youri Latortue ki te montre li pat dakò ak vòt sansi majorite depite yo te bay gouvènman Jean Henry Céant an, fè konnen peyi a pa gen pwoblèm premye minis men pito yon dyalòg ant tout sektè pou yon solisyon dirab nan kriz politik la.
