Depite Charlie Crist ranpòte nominasyon pati Demokrat la pou gouvènè eta Florid. Savledi misye pral twoke kònn ni ak Gouvènè aktyèl la, Repibliken Ron DeSantis nan eleksyon mwad Novanm nan.
DeSantis ap eseye ranpòte la viktwa pou yon dezyèm manda, ki taka sèvi kòm pwen depa pou yon kandidati potansyèl pou prezidans la.
Lè yo chwazi Crist, Demokrat Florid la pote kole ak yon kandida anpil elektè tradisyonèl pati a te konsidere tankou chwa ki pi si a.
Crist ki gen 66 zan, bat Nikki Fried, komisè agrikilti eta a ki te mennen yon kanpay ki pi pwogresis.
Depite Val Demings ranpòte alèz alèz nominasyon pati Demokrat la pou defye Senatè Repibliken Marco Rubio nan eleksyon Novanm nan. Demings, ki se yon ansyen chèf lapolis gen chans pou'l tounen premye fanm nwa ki reprezante Florid nan Sena a.
Epi Depite Ayisyèn Amerikèn Sheila Cherfilus McCormik ranpote eleksyon primè pati Demokrat la pou reprezante Florid nan La Chanm.
Pandansetan Ayisyèn Amerikèn Naomi Blemur ranpòte nominasyon pati Demokrat la pou pòs Komisè Agrikilti Florid.
