Accessibility links

Siri: Plis Batay nan Damas yon jou aprè Asasina 3 Manm Gouvènman an

  • Ekip Sèvis Kreyòl VOA

Nan Damas, kapital Siri, konfwontasyon yo ap kontinye ant fòs gouvènmantal yo ak konbatan rebèl yo, yon jou aprè ansasina minis defans la ak 2 lòt manm gouvènman rejim Assad la.

Rebèl yo pran responsablite pou eksplozyon bonm ki te fèt mèkredi 19 jiy] 2012 la nan Damas; daprè sa yo di, se kòmansman lafen pou gouvènman Prezidan Bashar al-Assad la.

Premye Minis La Grand Bretay la, David Cameron, lanse yon apèl prese-prese bay Konsèy Sekirite Nasyon Zini an pou mande l voye kèk mesaj klè e djanm konsènan sanksyon lap pran kont rejim siryen an. Chèf gouvènman britanik la di li lè, li tan pou Misye Assad la fè wout li.

Misye Caremon deklare:
“Pou sa k konsènen Siri, mwen genyen yon mesaj trè klè pou Prezidan Assad; sè ke li lè pou l ale. Li lè, li tan pou yon tranzisyon kòmanse fèt. San di pètèt, La Grand Bretay pa apiye vyolans kap sòti ni yon bò, ni lòt bò. Men, si pa genyen yon tranzisyon, li klè lagè sivil pral eklate. Mwen kwè nou pa bezwen linèt pou n wè sa, dapre sa k ap pase sou teren an."

Konsèy Sekirite a genyen pou l vote jedi 19 jiyè a sou yon pwojè-rezolisyon peyi oksidantal yo apiye e ki ta kapab enpoze sanksyon sou do gouvènman Assad la. Lachin ak Larisi pa dakò ak plan sa a. Nan Washington, yon pòtpawòl Prezidan Barack Obama, Jay Carney, fè konnen listwa pral jije tout peyi ki apiye rejim Assad la.

Misye Carney di:

“Mesaj nou pou Larisi ak lòt yo, sè ke si ou mete w bò kote Assad, eben, listwa pral genyen pou jije w sèvèman; e si yon peyi vle kontinye genyen relasyon avèk Siri e ak pèp siryen an, se pou l pran bon desizyon an kounyela a menm, paske avni Siri pap genyen Assad ladan n.”

Yon eksplozyon bonm ki te fèt mèkredi nan Damas touye minis defans la, Daoud Rajha, ak 2 lòt manm gouvènman an: vis-minis defans la, Asseff Shawkat --ki te yon bò-frè Prezidan Assad-- avèk yon jeneral lame siryèn nan.
XS
SM
MD
LG