Accessibility links

Masak 150 moun nan vilaj Hama, nan Siri, daprè Opozisyon an

  • Ekip Sèvis Kreyòl VOA

Daprè militan opozisyon nan Siri, fòs gouvènmantal yo, ki sèvi ak tank, gwo machin blende epi elikoptè, masakre plis pase 150 moun nan vilaj Hama –pi fò viktim yo se sivil. Militan yo ak temwen fè konnen, nan jounen jedi 12 jiyè 2012 la, sòlda yo vide gwo kout zam lou sou vilaj Treimsa anvan yo antre nan zòn nan. Yon lidè rebèl di kantite moun ki mouri yo kapab monte rive 200.

Lèzetazini di kantite manm lame siryèn nan ak ofisyèl diplomasi peyi a k ap kouri kite pòs yo, montre mouvman rebelyon kont Prezidan Bashar al-Assad la ap ogmante. Daprè Sekretè Deta Hillary Clinton, defeksyon sa yo (sètadi, patizan rejim nan kap chanje kazak yo, kite pòs yo pou yo antre nan kan opozisyon an) fè wè presyon an ap montre sou misye al-Assad pou l kite pouvwa a.

Chèf diplomasi amerikèn nan di :
"Ekonomi peyi a an degraba. Se redi rejim nan ap redi pou wè si la kenbe grif li toujou sou anpil rejyon nan peyi a. Alòs, nou konte sou manm Konsèy Sekirite a, san bliye Larisi, pou yo pote-kole ak nou pou n adopte yon resolisyon serye ki va bay anvwaye espesyal Kofi Annan tou sa li bezwen."

Madam Clinton pale ak Misye Annan semèn sa a aprè anvwaye espesyal la te fè kèk rankont ak otorite yo nan vil Damas, anvan li fè fè yon vwayaj konsiltasyon nan vil Teheran, nan Iran, ak Bagdad, nan peyi Irak.

Chèf diplomasi amerikèn nan fè konnen li jwenn ankourajman nan le fèt ke Misye Annan ap mande yon rezolisyon ki a la fwa apiye tranzisyon politik la nan Siri, epi mache ak bon jan konsekans pou sila yo ki pa respekte rezolisyon sa a.
XS
SM
MD
LG