Minis defans ameriken an, Leon Panetta, di rèv Etazini genyen pou Irak ta vinn tounen yon nasyon endepandan e ki granmoun tèt li , enben rèv sa a pase nan faz reyalite kounye a, nan moman Washington ap mete fen nan misyon militè li a nan nasyon arab la.
Mesye Panetta pale nan yon seremoni ki dewoule nan Bagdad, li kalifye moman sa a kòm yon okazyon istorik ni pou pèp irakyen an, ni pou pèp ameriken an. Seremoni sa a dewoule kèk semèn anvan yon dat limit 31 desanm pou rès sòlda Etazini yo soti nan Irak.
Te gen apeprè 4 mil sòlda ameriken ki rete nan Irak, yon kantite redwi konparativman a 170 mil ki te genyen nan somè lagè a. Minis defans Etazini an, Leon Panetta deklare sòlda sa yo pral kite Irak , yo konnen yo te ede pèp irakyen an kòmanse yon nouvo chapit nan istwa li ki se libere de tirani, e espwa total pou prosperite ak lapè.
