Accessibility links

Kominote Entènasyonal  la Pwomèt Plizyè Milya Dola pou Rekonstruksyon Ayiti


Bayè de fon entènasyonal yo fè yon rankont nan katye jeneral Nasyonzuni nan Nouyok kote yo pwomèt $5,3 milya dola asistans pou Ayiti pandan 2 zan kap vini yo pou ede ak rekonstruksyon peyi a apre tranbleman de tè 12 Janvye a.

Sekretè-Jeneral L'ONU a, Ban Ki-moon anonse nouvèl la Mèkredi nan fen konferans bayè de fon entènasyonal la ki dure yon sèl jou e ki rasanble reprezantan plis pase 100 peyi etranje. Lajan yo pwomèt la fè pati yon angajman a lon tèm pou yon valè $9,9 milya pou peyi d'Ayiti.

Sekretè-jeneral la di kominote entènasyonal la kole tèt ansanm yon fason "dramatik e an solidarite ak pèp Ayisyen an" pou ede peyi a reprann ni apre devastasyon trajedi 12 Janvye pase a.

Sekretè D'Eta Hillary Clinton pwomèt $1,15 milya dola nan non Lèzetazuni pou ede rekonstwi Ayiti a lon tèrm. Unyon Euwopeyèn nan pwomèt $1,6 milya, e lot peyi yo pwomèt divès som lajan.

Sekretè Clinton di se Ayiti ki va dirije jefo rekonstruksyon an yon fason transparan e ki gen kom bu pou atenn rezulta konkrè. Madan Clinton ajoute responsab yo pral travay ak gouvènman Ayisyen an sou fason yo pral jere epi livre asistans sa a.

Konferans L'ONU an te gen kom bu pou kotize $3,8 milya pou peye frè rekonstruksyon Ayiti pandan 18 mwa. Otorite yo estime sa va pran yon afè de 10 zan pou rekonstwi Ayiti e ke sa pral koute yon som lajan $11,5 milya.

Ayiti tabli yon Komisyon Rekonstruksyon Enterimè ki gen 23 manm pou supèvize pwojè rekonstruksyon an. Premye Minis Ayisyen an Jean-Max Bellerive, ansyen prezidan Ameriken Bill Clinton ki se anvwaye espesyal Nasyonzuni pou Ayiti pral dirije nouvo gwoup sa a. Yo pral kowodone som lajan peyi etranje ap voye fè Ayiti kado, detèmine kijan lajan sa a pral depanse, epi asure ke okenn nan lajan an pa gaspiye.

Sekretè-jeneral Ban te patwone konferans Mèkredi a ansanm ak Sekretè D'Eta Clinton epi Prezidan Ayisyen an Rene Preval. Li te remèsye kominote entènasyonal la pou jefo li kontinye bay Ayiti.

Nan menm kout kat la, Misye Ban nomen Edmont Mulet (ki se moun peyi Guatemala) reprezantan espesyal li Anayiti. Misye Mulet te okipe pos sila a nan yon kapasite pwovizwa apre direktè misyon stabilizasyon Nasyonzuni Anayiti (MINUSTAH), Hedi Annabi, te mouri nan tranbleman de tè a.

XS
SM
MD
LG