Sekretè Deta ameriken an, Hillary Clinton, anonse lendi li
pral fè yon vizit solidarite madi nan Chili kote tranblemann'tè samdi 27 fevriye
a pote anpil dezolasyon. Chèf diplomasi Etazini, ki tap pale nan vil
Montevideo (kapital Uruguay) anonse lap pote ekipman kominikasyon pou gouvènman
chilyen an. Clinton te nan kapital urugweyen an pou prestasyon sèman nouvo prezidan an, José Mujica.
Akòz kataklis la, sekretè Deta Hillary Clinton
deside rakousi vizit yon jounen li te planifye nan Santiago a. Olye de sa, madan
Clinton pral pase kèk èd'tan sèlman nan ayewopò a pou yon chita-pale ak prezidan
Michelle Bachelet e ak prezidan-eli a, Sebastian Pinera.
Men nan yon
rankont ak laprès nan Montevideo, Clinton di li deside fè yon vizit
senbolik nan Santiago pou montre solidarite Lèzetazini ak Chili, epi delivre yon
premye kagezon ekipman kominikasyon "d'urgence" otorite chilyen yo te
mande.
"Yo te mande ekipman kominikasyon...mwen genyen yon pòsyon nan yo avèk mwen nan avyon an". Na voye lòt ekipman teknik yo pa avyon laba-a. Men youn nan rezon yo mande'm kontinye ak vwayaj mwen an, se pou evalye ki lòt bagay yo ka bezwen, epi pou deklanche san pèditan pwosesis pou delivre yo a." Deklarasyon chèf diplomasi amerikèn nan."
Ekipman elektwonik se premye asistans Chili te reklame
Lèzetazini apre kokenn tranblemann tè samdi dènye a. Pandan yon konvèsasyon nan
telefòn ak dirijan chilyen yo, prezidan Barack Obaman ak Sekretè Deta Clinton te
pwopoze, pami lòt òf, pou Lèzetazini voye nan Chili ekip rechèch ak ekip
sekou.
Prezans Clinton nan seremoni prestasyon sèman nouvo prezidan
urugweyen an demontre angajman gouvènman Obama a pou l' travay ak gouvènman
latino-ameriken yo, kelkeswa tandans politik yo−menm ak sa ki panche agoch tankou
gouvènman Uruguay a. Nouvo prezidan peyi a, Jose Mujica, se ansyen manm yon
mouvman geriya "urbain" ane 70 yo, e li pral ranplase Tabare Vazquez−manm yon
laj koalisyon plizyè pati gochis.
Nan yon "point de presse" ak misye Mujica nan Montevideo,
anvan seremoni prestasyon sèman an, madan Clinton te salye efò li pou l'
reyinifye peyi a e pou l' travay ak opozisyon an apre eleksyon chaje konpetisyon
mwa novanm 2009 la.
Misye Mujica, bò pa li, admèt Latino-Ameriken yo genyen
anpil prejije ki remonte depi nan tan benbo ak anpil "stéréotypes" konsènan òm
politik ameriken yo. Men li ajoute sèten nan yo al bwa-chat ak eleksyon Barack
Obama nan mwa novanm 2008 la kòm premye Nwa prezidan Lèzetazini. Mujica di "Se
pa yon bagay nou pa te janm panse ki posib... e se te sempleman pwòp prejije
pa nou"... Se yon leson, yon bèl leson, nou aprann. E sa souliyen bèl chanjman
kap fèt atravè Lèzetazini.
Clinton, ki te konte pase nuit lendi a nan
Santiago, kapital Chili, deside pito ale nan vil Buenos-Aires pou yon chita-pale
ak prezidan Ajantin nan, Fernandez de Kirchner.
Vizit sa a ap dewoule nan
moman tansyon an ap monte ankò ant Ajantin ak Grande Bretagne apwopo zile
Malouines yo (Falkland Islands pou Britanik yo, Malvinas pou Ajanten yo) e ki
sitiye sou kòt sid Ajantin.
Lèzetazini pa pran pozisyon ni pou youn ni pou lòt nan revandikasyon yo sou achipèl la−revandikasyon ki te debouche sou yon lagè brèf an 1982.