LaRisi voye 2 batayon sistèm misil sol-air ak yon pakèt djèt konba ale nan Belarus pou ekzèsis yo, kote Jeneral Valery Gerasimov, chef deta majò lame rus la, ap kòmande ekzèsis yo k ap tanmen jodi Jedi a.
Antrènman nan Belarus la se dènye menas ki vini kont Ukrèn, ki gen kapital li Kyèv nan distans sèlman 210 kilomèt ak pati sid fwontyè a. Moskou deplwaye tou bato de gè nan Lanmè Nwa a e li rasanble plis pase 100-mil sòlda arebò pati lès Ukrèn.
Gouvènman Kyèv la anonse 10 jou ekzèsis militè pa li, k ap koumanse jodi jedi a tou, k ap sèvi ak avyon san moun e ak misil anti-tank ke alye yo nan loksidan te voye ba li.
Pòtpawòl Kremlen Dmitry Peskov fè konnen LaRisi t ap òganize ekzèsis ansanm ak Belarus pou konbat menas pou sekirite ke li pa te janm konnen anvan.
