Accessibility links

Breaking News

Sekretè Deta Clinton Mande Plis Sanksyon kont Peyi Siri


Sekretè deta ameriken-an, Hillary Clinton, lanse apèl pou l mande Nasyon Zini pran sanksyon malouk kont Siri si peyi sa a pa vle mete an aplikasyon yon plan lapè l’ONU apiye pou rezoud kriz ki pete akoz yon mouvman leve-kanpe ki la depi yon lane nan peyi a. Chèf diplomasi amerikèn nan lanse apèl sa a jedi 19 avril 2012 la, nan yon rankont ki reyini pi gwo diplomat plis pase yon douzèn peyi nan vil Pari, an Frans. Peyi sa yo --ki rele tèt yo “peyi zanmi Siri”-- apiye mouvman rebelyon opozisyon an kont rejim gwo ponyèt, gouvènman diktatoryal prezidan Bashar al-Assad la.

Madam Clinton deklare:

“Nou tout ki la a, nou vini akoz gwo fristrasyon nou, santiman revòlt nou, akoz nou fache devan sa nou wè kap pase nan peyi Siri. An menm tan, malgre tout prèv nou genyen jiskaprezan e ki ta dwe ekouraje nou, nou gen espwa misyon entènasyonal Kofi Annan nan kapab bay bon rezilta, a kòmanse pa travay obsèvatè nou pral voye yo. Sepandan nou pa dwe bliye plan an genyen 6 pwen ladan n ; yon moun pa ka chwazi moso, kite moso ; fok gouvènman siryen an aksepte li totalman ; fok li aplike tou lè 6 pwen yo."

Sekretè Deta Clinton di gouvènman ameriken an kwè konsèy sekirite l’ONU an ta dwe adopte yon anbago zam kont Siri epi enpoze restriksyon vwayaj sou otorite ki nan gouvènman an, yon fason pou fòse Prezidan al-Assad kite pouvwa a.
XS
SM
MD
LG