Konbatan rebèl nan Siri yo pati kite distri Baba Amr vil Homs nan, apre yo finn pase yon mwa ap resevwa gwo frap nan men fòs k ap defann prezidan siryen Basahar Al Assad yo.
Rebèl sa yo, ki rele tèt yo Brigad revolisyonè Baba Amèr, fè konnen y ap kite zòn nan, dekwa pou epanye lavi 4 mil sivil ki ensiste pou rete lakay yo.
Rebèl yo kontinue pou di : "retrè taktik yo fè la a gen pou wè ak kondisyon umanitè yo k ap vinn pi mal de jou an jou lotbò a, kote moun manke manje, medikaman, dlo potab ak elektrisite. Anplis desa, kominikasyon yo koupe epi kantite zam yo ap diminye. "
Obsèvatè dwazimen siryen an, ki baze nan kapital britanik la, Lond, di foss ki anfavè prezidan Basahar Al-Assad yo debake nan katye rezidansyèl yo , kote y ap poze arestasyon pa bann e pa pakèt.
Dapre nouvèl yo, sòlda gouvènmantal Siri yo touye omwen 17 moun nan katye Babba Amè a . Nan yon kominike rebèl yo pibliye, yo mande pou Lakwa Wouj entènasyonal pote asistans imanitè nan zòn nan, e yo lanse avètisman pou di : si fòs gouvènmantal atake sivil lotbò a, fòs rebèl yo pral reyaji sevèman kont yo pou aksyon yo poze yo.