Misyonè etranje gang te kidnape ann Ayiti yo chape poul yo semèn pase a nan mitan lanuit. Se konsa yo kouri kite kay kote ravisè te kenbe yo, e yo te chaje plizyè kilomèt, pou travèse teren difisil ak limyè lalin sèlman pou eklere chimen yo. Ti bebe ak timoun te fè pati gwoup la, dapre Christian Aid Ministries, ki se oganizasyon ki te anplwaye misyonè sa yo.
Responsab ajans la, ki gen katye jeneral li nan eta Ohio te bay detay sou kijan misyonè yo te rive chape pandan yon konferans pou laprès jodi Lendi a.
Gang 400 Mawozo te kidnape yon total 17 moun nan gwoup misyonè a - 12 granmoun ak 5 timoun 16 Oktob pase a, yon ti tan apre yo te vizite yon orfelina nan Ganthier.
Nan gwoup la te gen 16 Ameriken ak yon Kanadyen.
Lidè gang la te mande yon ranson $1 milyon pou chak pami moun sa yo. Li pa klè si yo te resevwa ranson pou moun yo te lage anvan sa.
Sepandan, Brian Nichols, sekretè d'eta adjwen pou zafè Emisfè Oksidantal yo te di VOA Kreyol Vandredi ke "Etazini pa peye ranson pou Ameriken yo kidnape lot bo dlo."
Douz moun ki chape semèn pase yo te pote yon timoun ki gen 3 zan, ke yo te vlope pou pwoteje'l kont branch ki te ka pike li, dapre pot pawol Christian Aid Ministries la, Weston Showalter.
Misye di apre yo te pase plizyè èdtan ap mache, solèy la te leve e yo te jwenn yon moun ki te ede yo rele yon moun ki te ka ede yo.
Misyonè yo te pran avyon Gad Kot Ameriken ki te mennen yo Florid, kote yo te reyini ak 5 otaj gang la te kidnape anvan sa.
Christian Aid Ministries montre foto pandan konferans de près li yo ki montre reyinyon otaj yo, ansanm ak yon videyo gwoup la kap chante yon chanson ki te enspire yo pandan yo te anba men gang lan.
