Prezidan ameriken an, Barack Obama, fè konnen sanksyon Konsèy Sekirite l’ONU an mete sou do Iran yo kòmanse genyen bon jan konsekans e nan plizyè nivo.
Pandan Misye Obama t ap pran lapawòl dimanch nan fen somè peyi ki gen kòt sou Pasifik la –somè ki t ap dewoule nan Hawayi-- li di li pral pran kontak ak dirijan peyi Larisi ak Lachin sou mwayen pou yo mete plis presyon toujou sou Teheran, yon fason pou fè l mete fen nan pwogram nikleyè l la.
Misye Obama deklare:
“Nou tou lè 3 dakò totalman ak objektif la, ki se chache gen asirans ke Iran pa devlope zam nikleyè e ke nou pa pwovoke yon kous pou zam nikleyè nan rejyon an. Se yon bagay ki nan enterè nou tout.”
Prezidan Obama kontinye pou l di Lèzetazini pa wete okenn opsyon sou tab la pou l fè Iran satisfè egzijans Konsèy Sekirite a.