Ann Ayiti, plizyè milye moun ki pa gen kay pou yo rete apre tranbleman de tè ki kraze kapital-la ak kèk lòt vil, toujou pa genyen yon tant yap tann depi lontan déjà; olye de tant, se moso plastik yo jwenn pou yo antoure kwen-tè kote yap viv jounen jodiya. Vrèman vre, viktim gwo soukous sa-a te lanse apèl bay otorite Ayisyen-yo ak ajans èd entènasyonal-yo, pou mande yo ede yo jwenn tant kòm yon solusyon de rechanj pwovizwa pou kay yo pèdi nan tranblemandetè-a; men se yon demand ki poko ka reyalize juskaprezan. dra an plastik ki sèvi pou antoure oubyen kouvri pòsyon tè kote moun yo rete-a, pa kapab pare lapli, jan yo te gen okazyon reyalize sa Jedi pase-a, lè yon lapli kontretan te tonbe sou kapital-la e sou zòn ki antroure l yo. Marie-Mona Destiron, se yon viktim soukous-la e manmzèl se manman 6 pitit.
"Kisa komunote entènasyonal-la pral fè pou akselere demach ki nesesè pou viktim tranblemandetè-a jwenn finalman tant yap tann pou ranplase plastik ki pa ka pare lapli-a?" li mande.
John Holmes, sou-sekretè-jeneral Nasyon Zuni e kowòdonatè Ajans Sekou Dujans l’ONU-an. Fè deklarasyon sou kesyon-an ki pa ankourajan dutou pou moun kap tann tant-yo.
“Konsèy klè espesyalis-yo bay, sè ke wi, tant-yo nesesè kèk kote; men sa ki merite priyorite-a, se prela, bwa, ak kòd, ke moun yo kapab utilize pou yo fabrike enstalasyon ki pi flexib e pi gwo, espesyalman si yap mete enstalasyon sa-yo nan anplasman kay-yo ki kraze… paske la, ou kapab fè avèk prela bagay ou pa ka fè avèk tant," Misye eksplike.
Men, lè nou pale ak viktim ki pran refuj nan kan ebèjeman-yo pou mande yo ki tip de enstalasyon pwovizwa yo prefere, majorite-a reponn pou di yo ta pi renmen gen tant olye de prela. Rezon-an, se pa sèlman paske tant-la tou pare pou enstale, alòske moun-yo pral oblije travay ak prela, kod e bwa pou yo fabrike yon enstalasyon; men, gen avantaj tant-la ofri, yo pap jwenn ak prela-a.
John Holmes, - sou-sekretè-jeneral Nasyon Zuni e kowòdonatè Ajans Sekou Dujans l’ONU-an ki te abòde dosye-a Vandredi -- ensiste pou'l di li pi bon pou òganizasyon kap bay asistans-yo fikse atansyon-yo sou prela e pa sou tant. O kòmansman, ajans sekou entènasyonal-yo te lanse apèl toupatou a travè lemond pou yo mande tant pou viktim-yo. Se sèlman 49,000 tant ki te déjà rive nan peyi-a, lè gouvènman Preval-Bellerive-la te vin anonse, Mèkredi pase-a, li prefere resevwa dra an plastik pou'l ofri moun ki deplase e ki pa gen kay pou yo rete depi tranbleman de tè-a te frappe peyi-a nan dat 12 Janvye pase-a.