“Avoka mwen yo pa te konseye m mande ki dokiman yo te ye. Mwen remèt bwat yo – yo remèt bwat yo bay Achiv Nasyonal, e n ap kopere kòmsadwa nan estimasyon ki ap fèt sou yo, travay mwen espere ki p ap pran tan pou fini e m espere ke lè sa a m ap gen plis detay,” se sa Biden di nan yon konferans pou laprès nan vil Meksiko apre reyinyon li ak Prezidan meksiken Andrés Manuel Lopez Obrador ak Premye-minis kanadyen Justin Trudeau.
Lendi, ekip avoka pèsonèl Biden te revele ke nan mwa Novanm pase, yo te jwenn yon lo dokiman ki la depi lè Biden te Vis-prezidan, kèk nan yo se dokiman sekrè, ke yo te jwenn yo nan biwo Sant Penn Biden pou Diplomasi ak Angajman Mondyal, yon enstiti ki pote non Biden e ki afilye ak Inivèsite Pennsilvani, biwo ke, dapre Mezon Blanch, Biden te konn itilize kèk fwa ant 2017 ak 2020. Kèk palmantè Repibliken ouvè ankèt sou kesyon an.
