Kò jeneral lame ikrenyen an fè konnen fòs li yo rive repouse 6 atak ris nan 24 trè pase yo nan rejyon Donbas, nan moman fòs ris ap vide kout kan-no tribò-babò sou riv dwat flèv Dnipro a ak sou vil Kherson ki nan pati sid peyi-a.
Apre chita-pale òganizasyon trete atlantik nò a tap fè nan vil Bukarès, kapital woumani, sekretè deta ameriken Antony Blinken di, nap site : zòn sa yo, se nouvo sib prezidan Vladimir Putin, lap lanse bonjan frap sou yo.
Mesye Putin santre kòlè ak fòs de frap li sou popilasyon sivil la, kote lap bonbabde enfrastrikti enèji ak sistèm dlo potab peyi vwazen li an, men estrateji sila a pap mache, fend-sitasyon.
