Mwayen Oryan
Yon Rapò LONU pou Dwamoun di Se Fòs Sekirite Izrayèl Ki Te Egzekite Jounalis Shireen Abu Akleh
Komisyonè Dwamoun Nasyonzini konkli ke jounalis palestinyen-amerikèn Shireen Abu Akleh, ki te mouri 11 me pase a, te tonbe anba kout zam fòs defans Izrayelyen yo, dapre sa yon pòtpawòl fè konnen vandredi.
Ravina Shamdasani, pòtpawòl Komisyon Dwamoun Nasyonzini an, bay yon konferans pou laprès nan Jenèv kote li deklare:
"Tout enfòmasyon nou rasanble -ki gen ladan l vèsyon lame Izrayèl la ak pwokirè jeneral palestinyen an- konfime le fèt ke kout zam ki te touye Madam Abu Akleh e ki te blese kòlèg li, Ali Sammoudi, te sòti nan mitan sòlda izrayelyen yo e non pa nan mitan Palestinyen ame, kontrèman ak sa otorite izrayelyen yo te di o kòmansman. Nou pa jwenn okenn enfòmasyon ki ta fè konprann Palestinyen ame ki tou pre jounalis yo te poze okenn aksyon."
Shamdasani ajoute: "Mwen jwenn sa twoublan anpil ke otorite izrayelyen yo pa louvri yon ankèt legal sou afè sa a."
Jounalis vedèt Al Jazeera a te gen sou li yon jakèt avèk enskripsyon "laprès" ekri sou li ak yon kas nan tèt li lè l te resevwa yon bal anba kas la. Li te nan kan refijye Jenin nan, ki anba kontwòl Palestinyen yo kote fòs militè israyelyen yo t ap mennen yon operasyon.
Dapre pòtpawòl la toujou, "Komisyonè Dwamoun Nasyonzini an, Michelle Bachelet, kontinye mande otorite Izrayèl yo louvri yon ankèt kriminèl sou lanmò Madam Abu Akleh ak lòt asasina ak blese grav sòlda Izrayelyen yo te komèt nan Si-Jòdani nan kad yon operasyon pou fè respekte lalwa nan Gaza."
Daprè Komisyon Adjwen l ONU an, depi kòmansman ane 2022, manm lame Izrayèl la touye 58 Palestinyen nan Si-Jòdani; pami viktim yo gen 13 timoun. Shamdasani fini pa di:
"Lwa entènasyonal sou dwamoun mande ouvèti yon ankèt rapid, apwofondi, transparan, endepandan ak san patipri sou nenpòt itilizasyon fòs ki te lakòz lanmò oswa blesi grav. Responsab zak sa yo dwe rann kont pou sa yo te fè."
See all News Updates of the Day
Yon Gwo Zotobre Iranyen Vizite Peyi Emira Arab Ini yo
Prezidan Emira Arab Ini, Sheikh Mohammed bin Zayed, resevwa jedi Ali Shamkhani ki se Sekretè Konsèy Siprèm Sekirite Nasyonal peyi Iran. Vizit sa fèt pou make rapwòchman diplomatik ki fèt ant peyi Iran ak Arabi Saoudit.
Dapre ajans ofisyèl Emirati WAM, 2 mesye yo te pale sou « relasyon ant 2 peyi yo ak fason yo kapab kolabore nan plizyè domèn diferan».
Otorite wo-plase Iran an te rankontre tou ak konseye sekirite nasyonal Emira yo, Sheikh Tahnoun bin Zayed.
Nan rankont li ak prezidan Emira yo, Ali Shamkhani te afime ke 2 peyi yo ka "fè gran pa nan devlopman koperasyon antre yo e nan diplomasi” ki konsène rejyon an.
Gwo zotobre Iranyen an te negosye nan Peken semèn pase a akò ki pèmèt Iran retabli relasyon diplomatik ak Arabi Saoudit, apre 7 lane kote relasyon yo te kraze.
Riyad ak Teheran te fè yon kite sa nan relasyon diplomatik an 2016 apre manifestan nan Iran te atake misyon diplomatik Arabi Saoudit apre yo te ekzekite yon relijye chiyit nan Arabi Saoudit.
Iran ak Arabi Saoudit Antann Yo Pou Yo Retabli Relasyon Diplomatik Antre yo
Iran ak Arabi Saoudit antann yo vandredi pou yo retabli relasyon diplomatik antre yo e re-ouvè anbasad yo apre dèz ane tansyon ant 2 peyi yo, ki te gen antwòt yon atak ki te fè gwo dega nan kè pwodiksyon petwòl nan wayòm nan e ke yo te lage sou do Teheran.
Antant la ki te fèt nan Peken, an Chin, semèn sa a, nan yon seremoni ki te dewoule nan Kongrè Popilè Nasyonal la, reprezante yon gwo viktwa diplomatik pou Chinwa yo pandan peyi arab yo nan Gòlf la wè kòmkwa, dapre yo, Etazini ap wete kò li tou dousman nan Mwayenn Oryan an. Sa fèt tou nan moman diplomat ap chache mete fen nan yon gè ki la nan Yemen depi plizyè lane, yon konfli kote Iran ak Arabi Saoudit antre byen fon e kanpe rèd sou pozisyon yo.
2 peyi yo pibliye yon kominike an komen sou antant la ansanm ak LaChin ki sanble te travay pou fè sa rive. Medya leta chinwa pa te rapòte akò a touswit.
Medya leta nan Iran moutre imaj ak video ki te fèt an Chin, dapre sa yo di, ki moutre reyinyon an. Yo moutre Ali Shamkhani ki se sekretè konsèy Sekirite Nasyonal Siprèm Iran, ak konseye sou sekirite nasyonal Arabi Saoudit, Musaad bin Mohammed al-Aiban, ak Wang Yi, ki se diplomat ki pi wo-plase an Chin.
Wang di, « tou le 2 pati yo moutre yo sensè. » Li ajoute, « LaChin sipòte ak tout kè li antant sa a. »
Sijòdani: Atak Izraelyen Lakoz Lanmò 6 Palestinyen
Yon rapò Ministè Sante Palestinyen an pibliye di ke 6 Palestinyen pèdi lavi yo madi nan yon atak militè Izraelyen te fè nan Jenin ki nan zòn nò Sijordani.
Yon premye rapò ministè a te di se 5 moun ki mouri, e nouvo rapò a ajoute youn ki vin fè 6.
Dapre temwen, atak la te deklanche gwo batay vyolan ant fòs Izraelyen yo ak konbatan Palestinyen nan yon kan refijye nan Jenin, batay ki te dire plis pase 2 zè de tan.
Omwens 10 Palestinyen Pèdi Lavi yo nan Operasyon Militè Israel Lanse nan Riv Oksidantal la
10 palestinyen pami yo yon adolesan 16 zan mouri e plis pase 80 lòt blese anba bal nan yon desant-de-lye lame izreayeylen nan Naplouz.
- Serge Michel
Almay Ekspilse 2 Diplomat Iranyen
Almay anonse mèkredi l ap ekspilse 2 diplomat peyi Iran kòm repons poutèt Iran kondane amò yon sitwayen alman.
Desizyon sa a vini yon jou apre otorite nan Iran te anonse santans la pou Jamshid Sharmahd, ki jwenn kondanasyon pou zak teworis.
Iran akize Sharmahd, yon Alman-Iranyen ki gen rezidans Etazini, kòmkwa li dirije branch ame yon gwoup ki anfavè monachi. Fanmi li di li te sèlman pòtpawòl yon gwoup opozisyon e ke sèvis ransèyman iranyen te anlve li.
« Nou mande Iran pou li revoke santans lanmò Jamshid Sharmahd la e ba li chans pou l jwenn yon jijman onèt ki baze sou lalwa, » se sa Minis Afè Etranjè alman Annalena Baerbock di nan yon kominike.
Baerbock di li konvoke chaje dafè Iran an, e ke Almay pa aksepte sa li rele yon “kokenn vyolasyon » dwa yon sitwayen alman.
Nan yon kominike madi, Baerbock fè konnen Sharmahd te jwenn arestasyon nan “kondisyon ki soulve anpil kesyon” e ke li « pa te janm gen sa ki menm sanble yon pwosè jis. »