Mwayen Oryan
Yon Rapò LONU pou Dwamoun di Se Fòs Sekirite Izrayèl Ki Te Egzekite Jounalis Shireen Abu Akleh
Komisyonè Dwamoun Nasyonzini konkli ke jounalis palestinyen-amerikèn Shireen Abu Akleh, ki te mouri 11 me pase a, te tonbe anba kout zam fòs defans Izrayelyen yo, dapre sa yon pòtpawòl fè konnen vandredi.
Ravina Shamdasani, pòtpawòl Komisyon Dwamoun Nasyonzini an, bay yon konferans pou laprès nan Jenèv kote li deklare:
"Tout enfòmasyon nou rasanble -ki gen ladan l vèsyon lame Izrayèl la ak pwokirè jeneral palestinyen an- konfime le fèt ke kout zam ki te touye Madam Abu Akleh e ki te blese kòlèg li, Ali Sammoudi, te sòti nan mitan sòlda izrayelyen yo e non pa nan mitan Palestinyen ame, kontrèman ak sa otorite izrayelyen yo te di o kòmansman. Nou pa jwenn okenn enfòmasyon ki ta fè konprann Palestinyen ame ki tou pre jounalis yo te poze okenn aksyon."
Shamdasani ajoute: "Mwen jwenn sa twoublan anpil ke otorite izrayelyen yo pa louvri yon ankèt legal sou afè sa a."
Jounalis vedèt Al Jazeera a te gen sou li yon jakèt avèk enskripsyon "laprès" ekri sou li ak yon kas nan tèt li lè l te resevwa yon bal anba kas la. Li te nan kan refijye Jenin nan, ki anba kontwòl Palestinyen yo kote fòs militè israyelyen yo t ap mennen yon operasyon.
Dapre pòtpawòl la toujou, "Komisyonè Dwamoun Nasyonzini an, Michelle Bachelet, kontinye mande otorite Izrayèl yo louvri yon ankèt kriminèl sou lanmò Madam Abu Akleh ak lòt asasina ak blese grav sòlda Izrayelyen yo te komèt nan Si-Jòdani nan kad yon operasyon pou fè respekte lalwa nan Gaza."
Daprè Komisyon Adjwen l ONU an, depi kòmansman ane 2022, manm lame Izrayèl la touye 58 Palestinyen nan Si-Jòdani; pami viktim yo gen 13 timoun. Shamdasani fini pa di:
"Lwa entènasyonal sou dwamoun mande ouvèti yon ankèt rapid, apwofondi, transparan, endepandan ak san patipri sou nenpòt itilizasyon fòs ki te lakòz lanmò oswa blesi grav. Responsab zak sa yo dwe rann kont pou sa yo te fè."
See all News Updates of the Day
Inyon Ewopeyen Sanksyone kat Kolon Izraelyen
Inyon Ewopeyen an mete Vandredi sanksyon sou kat kolon Izraelyen ak de gwoup militan Izrayelyen "ekstremist" pou vyolans yo te fè kont Palestinyen nan Sisjòdani ak Jerizalèm.
Konsèy Inyon Ewopeyen an ki reprezante 27 eta manm Inyon an yo, deklare endividi ak gwoup sa yo "responsab pou vyolasyon dwa moun grav kont Palestinyen".
- Serge Michel
Izrayèl Lanse yon Frap Aeryen Kont Iran
Izrayèl lanse yon frap aeryen andan Iran nan douvanjou jodi vandredi a, nan lè lokal, dapre laprès Etazini ki site kèk sous izraelyen ak ameriken san bay non yo.
Ensidan sa a se dènye nan yon seri frap kif-kif ant 2 advèsè rejyonal yo, men Teheran minimize ensidan an jodi vandredi a e li fè konnen li pa gen entansyon reponn.
Jounal New York Times ak Washington Post site pawòl otorite izraelyen ki di yo lanse yon frap aeryen nan teritwa Iran. Plizyè ògàn nouvèl site pawòl otorite ameriken ki di se yon atak misil.
Yon pòtpawòl lame izraelyen ke LaVwadlamerik te kontakte di li p ap pale sou kesyon an pou kounyea.
Direktè ajans espasyal aeryen Iran an di ke fòs defans aeryen yo desann plizyè dronn.
- Jean Robert Phillipe
Larisi Mande Izrayel ak Iran Evite Aksyon ki ka Pwopaje Konfli a Pi Plis nan Mwayèn Oryan an
Larisi mande Izrayèl ak Iran pou yo evite aksyon ki ka pwopaje pi plis konfli nan Mwayèn Oryan an. Jean Robert Philippe gen detay.
- Serge Michel
Izrayèl Lanse Frap Sou Tèritwa Gaza
Lame Izrayèl la fè konnen jodia fòs li yo lanse frap sou tout teritwa Gaza a ki vize konbatan Hamas ak enfrastrikti, e lanse atak ki touye 2 militan Hezbollah nan sid Liban.
Ajans France-Presse site pawol Hezbollah tou ki di ke 2 konbatan li tonbe nan yon frap Izrayèl nan Kfar Kila.
Izrayèl di 14 solda li blese ayè mèkredi a nan yon atak Hezbollah sou pati nò Izrayèl.
Yon lòt kote, Konsèy Sekirite l-ONU an ap pare pou vote sou yon rezolisyon pou fè Pouvwa Palestinyen an tounen manm total-kapital l-ONU.
Si Konsèy Sekirite a rekòmande manm yo vote pou aplikasyon Pouvwa Palestinyen an, Asanble Jeneral l-ONU an ka apwouve li ak yon majorite 2 tyè.
Men pèsonn pa konnen sa ki pwal pase kandidati a nan Konsèy Sekirite a, kòm Etazini gen dwa veto nan Konsèy la.
- Serge Michel
Etazini Ak Alye li Yo Ap Travay Sou Sanksyon Kont Iran
Etazini di l ap travay ak alye li yo sou yon repons kowòdone pou atak ak dronn e ak misil ke Iran te lanse sou teritwa Izrayèl pandan wikenn nan. An menm tan, li kontinye ekzòte Izrael pou li mete dlo nan diven li e evite limen yon konfli pi laj.
Prezidan Joe Biden ap « kòdone ak alye e ak patnè li yo, pami yo Gwoup G7 la, e ak lidè tou 2 pati yo nan Kongrè a, sou yon repons global, » se sa konseye sou sekirite nasyonal Jake Sullivan di nan yon deklarasyon.
Etazini pwal enpoze nouvo sanksyon ki vize Iran nan jou ki ap vini yo, pou repete Sullivan, antwòt pwogram misil ak dronn li a ak tout gwoup ki sipòte Kò Gad Revolisyonè Iran an ak Ministè Defans Iran.
Li di tou Etazini pwal akselere pwogram sistèm defans aeryen li pou bare misil ak dronn.
Responsab nan alantou Biden mande plizyè fwa pou kalme tansyon an. Prezidan an « pa vle wè yon gè ak Iran, pa vle wè konfli a laji, » se sa pòtpawol Mezon Blanch pou sekirite nasyonal John Kirby di jounalis ayè madi a.
--
Facebook Forum