Joseph Joel John, ki gen 51 lane, fè premye parèt li devan Jij ameriken, Majistra Lauren Louis, ki syeje nan Miami, nan apremidi jodi lendi a.
John tonbe anba akizasyon dèske li te mele nan konplo pou komèt asasina oubyen kidnaping andeyò Lèzetazini epi li te ofri materyèl ki te sèvi nan asasina a, alòske li te konnen oubyen li te okouran ke materyèl sa a ta pral sèvi pou reyalize konplo pou touye moun oubyen kidnape moun.
Pèsonalite ki fè anons la se Asistan Minis Jistis Matthew G. Olsen (Divisyon Sekirite Nasyonal nan Depatman Jistis), Komisè Gouvènman Juan Antonio Gonzalez, pou Distri Sid Florid la, avèk Ajan Espesyal an chaj George Piro, ki nan Biwo Lokal FBI nan Miami.
Si yo jwenn John koupab pou akizasyon ki sou do l yo, li kapab pran yon pèn maksimòm tout lavi nan prizon. Yon jij federal nan yon tribinal distri pral gen pou deside ki santans akize a merite, apre li va fin konsidere Regleman ki Reji Santans yo Ozetazini ak lot faktè legal apwopriye.
FBI ap mennen ankèt sou ka a ansanm avèk lòt patnè nan sektè lalwa a, avèk bon jan asistans HIS.
Se Asistan Minis Jistis Andrea Golddberg avèk Walter Norkin, pou Distri Sid Florid la, k ap dirije akizasyon an, avèk asistans Avoka Frank Russo, Jessica Fender ak Emma Ellenrieder, k ap travay sou Jesyon Jijman nan Divizyon Sekirite Nasyonal la. Biwo Afè Entènasyonal Depatman Jistis la ap ofri yon asistans ki enpòtan anpil.
Yon plent kriminèl se sèlman yon alegasyon, e tout akize prezime inosan toutotan yo pa pwouve nan yon tribinal li koupab san okenn dout rezonab sou kilpablite li
