Mwayen Oryan
Avètisman Teyeran pou Jerizalèm: “Iran Pral Pike Kè Izrayèl si Peyi sa a Atake Nou”
Lame iranyèn nan pral frape kè Peyi Izrayel si li poze “menm yon ti aksyon” kont Repiblik Islamik la.” Se deklarasyon Prezidan iranyen an, Ibrahim Raisi, fè lendi nan okazyon yon parad militè nan moman gen blokaj nan negosyasyon ant Teyeran ak puisans mondyal yo pou relanse yon akò yo te siyen an 2015 sou pwogram nikleyè Iran an.
Izrayèl –ke moun konnen an jeneral kòm sèl peyi nan Mwayen Oryan an ki gen zam atomik- fè konnen okenn akò nikleyè ak Iran pa p mare men li e li kapab pran aksyon pou kont li pou l atake entalasyon nikleyè Iran yo.
Prezidan Raisi, ki t ap fè yon diskou televize pou make fèt nasyonal laame a, deklare:
“Rejim syonis la, men yon mesaj pou ou: Si ou poze nenpòt ki aksyon kont peyi nou an, fòzame nou yo pral vize kè rejim syonis la. “
Lèzetazini ak Iran gen plis pase 2 zan depi y ap negosye yon relans akò entènasyonal sou pwogram nikleyè Iran an apre Washington te kite akò a an 2018 epi li te enpoze sanksyon sou Iran. Men, nouvo seri negosyasyon yo te kanpe mwa pase a akoz kesyon pou konnen si Lèzetazini ap wete Gad Revolisyonè Iran an sou lis òganizasyon teworis etranje yo, jan Teyeran ap reklame sa a.
See all News Updates of the Day
- Serge Michel
Izrayèl Lanse yon Frap Aeryen Kont Iran
Izrayèl lanse yon frap aeryen andan Iran nan douvanjou jodi vandredi a, nan lè lokal, dapre laprès Etazini ki site kèk sous izraelyen ak ameriken san bay non yo.
Ensidan sa a se dènye nan yon seri frap kif-kif ant 2 advèsè rejyonal yo, men Teheran minimize ensidan an jodi vandredi a e li fè konnen li pa gen entansyon reponn.
Jounal New York Times ak Washington Post site pawòl otorite izraelyen ki di yo lanse yon frap aeryen nan teritwa Iran. Plizyè ògàn nouvèl site pawòl otorite ameriken ki di se yon atak misil.
Yon pòtpawòl lame izraelyen ke LaVwadlamerik te kontakte di li p ap pale sou kesyon an pou kounyea.
Direktè ajans espasyal aeryen Iran an di ke fòs defans aeryen yo desann plizyè dronn.
- Jean Robert Phillipe
Larisi Mande Izrayel ak Iran Evite Aksyon ki ka Pwopaje Konfli a Pi Plis nan Mwayèn Oryan an
Larisi mande Izrayèl ak Iran pou yo evite aksyon ki ka pwopaje pi plis konfli nan Mwayèn Oryan an. Jean Robert Philippe gen detay.
- Serge Michel
Izrayèl Lanse Frap Sou Tèritwa Gaza
Lame Izrayèl la fè konnen jodia fòs li yo lanse frap sou tout teritwa Gaza a ki vize konbatan Hamas ak enfrastrikti, e lanse atak ki touye 2 militan Hezbollah nan sid Liban.
Ajans France-Presse site pawol Hezbollah tou ki di ke 2 konbatan li tonbe nan yon frap Izrayèl nan Kfar Kila.
Izrayèl di 14 solda li blese ayè mèkredi a nan yon atak Hezbollah sou pati nò Izrayèl.
Yon lòt kote, Konsèy Sekirite l-ONU an ap pare pou vote sou yon rezolisyon pou fè Pouvwa Palestinyen an tounen manm total-kapital l-ONU.
Si Konsèy Sekirite a rekòmande manm yo vote pou aplikasyon Pouvwa Palestinyen an, Asanble Jeneral l-ONU an ka apwouve li ak yon majorite 2 tyè.
Men pèsonn pa konnen sa ki pwal pase kandidati a nan Konsèy Sekirite a, kòm Etazini gen dwa veto nan Konsèy la.
- Serge Michel
Etazini Ak Alye li Yo Ap Travay Sou Sanksyon Kont Iran
Etazini di l ap travay ak alye li yo sou yon repons kowòdone pou atak ak dronn e ak misil ke Iran te lanse sou teritwa Izrayèl pandan wikenn nan. An menm tan, li kontinye ekzòte Izrael pou li mete dlo nan diven li e evite limen yon konfli pi laj.
Prezidan Joe Biden ap « kòdone ak alye e ak patnè li yo, pami yo Gwoup G7 la, e ak lidè tou 2 pati yo nan Kongrè a, sou yon repons global, » se sa konseye sou sekirite nasyonal Jake Sullivan di nan yon deklarasyon.
Etazini pwal enpoze nouvo sanksyon ki vize Iran nan jou ki ap vini yo, pou repete Sullivan, antwòt pwogram misil ak dronn li a ak tout gwoup ki sipòte Kò Gad Revolisyonè Iran an ak Ministè Defans Iran.
Li di tou Etazini pwal akselere pwogram sistèm defans aeryen li pou bare misil ak dronn.
Responsab nan alantou Biden mande plizyè fwa pou kalme tansyon an. Prezidan an « pa vle wè yon gè ak Iran, pa vle wè konfli a laji, » se sa pòtpawol Mezon Blanch pou sekirite nasyonal John Kirby di jounalis ayè madi a.
--
Izrayèl di lap Reflechi sou Repons li Pral Bay Iran pou Dig Dal Misil ak Dron li Lanse Kont li
Izrayèl anonse li pral reponn atak Iran lanse kont li a kote li lapide l ak misil epi dron. Sandra Lemaire gen detay.
Facebook Forum