Accessibility links

Breaking News

Eta Inyon: Yon Diskou ak Gwo Pawòl Piman Bouk Kont Advèsè li


Prezidan Joe Biden pwononse premye diskou State of the Union li, diskou sou Eta Peyi a devan Kongre Ameriken an 1 Mad, 2022.

Prezidan Joe Biden te vini nan premye diskou li sou Eta Inyon an madi swa ak gwo pawòl piman bouk kont advèsè li ki se lidè autokrat, kidonk lidè ki sèk kòk chante nan peyi yo, e li te pote yon kalman pou popilasyon li a ki nan sityasyon difisil, ki pran kou anba yon pandemi sevè, pri pwodui yo k ap moute, ansanm ak yon divizyon politik makawon.

Kèk manm nan Kongrè a te souke ti drapo ble e jòn ki se koulè drapo Ikrèn, e Biden pa te pèdi tan pou l abòde konfli ki ap ogmante ant LaRisi ak Ikrèn, kote li anonse ke l ap fèmen touswit espas avyasyon Etazini pou avyon ris pa vole ladann. Li te rete sou sijè sa a pandan 10 minit.

"Sa gen 6 jou, Vladimir Putin nan LaRisi te chache souke fondasyon mond lib la lè l te panse ke li ta ka jwenn yon repons menasan menm jan ak estil gouvènman li a," se pawòl Biden devan sa ki sanble te yon aplodisman ki te gaye nan foul Demokrat ak Repibliken yo. Biden kontinye

pou l di, "Men li te fè move kalkil. Li te panse li te ka fè tank li woule antre. Olye de sa, li te jwenn ak yon miray fòs ke li pa te janm imajine. Li te jwenn ak pèp Ikrèn nan."

Oksana Markarova, anbasadè Ikrèn nan Etazini, te chita ansanm ak premyè dam Jill Biden nan kare dèyè prezidan an.

Sou kesyon ekonomi-an, Biden te santre sou yon plan an 4 etap li vle akonpli: ogmante djòb faktori nan Etazini e ranfòse chèn distribisyon machandiz yo; travay pou fè pri pwodui yo desann; ankouraje konpetisyon onèt pou pwoteje ti biznis yo; elimine baryè ki anpeche moun jwenn djòb ki byen peye.

Divizyon nan Kongrè a te parèt lè kèk palmantè te rele dèyè l apre li te pale de pwojè-lwa pou soulaje efè pandemi an, ki rele Plan Sovtaj Ameriken an.

XS
SM
MD
LG