Pandan kèk mwa anvan ofansiv lame Irak la te lanse nan vil Mosoul, militan gwoup Eta Islamik yo te fabrike plizyè milye mòtye, wokèt, bonm ak minisyon nan kad antrepriz nan nivo endistriyèl militan yo te tabli nan tout Kalifa a, an palan de tout teritwa ki anba men gwoup la.
“Sistèm pwodiksyon zam militan yo gen kontwòl sou kalite ak presizyon nan wo nivo e gen yon santral ki kontwole kalite pwodiksyon an,” dapre CAR, yon òganizasyon ki espesyalize nan zam, ki baze nan vil Lond ann Angletè, ke Inyon Ewòp la finanse, e ki swiv izaj ak deplasman zam konvansyonel.
Nan yo rapò CAR pibliye mèkredi 14 Desanm, anketè yo di yo rasanble prèv sou plis pase 5000 wobi ak mòtye nan divès etap pwodiksyon, zam endistri gwoup eta islamik la pwodui. CAR rapòte ke li gen prèv sou 500 mòtye ki te pare pou izaj, ke fòs irakyen yo te ranmase sou chan-batay la.
Ekspè CAR yo estime kantite zam gwoup Eta Islamik la te fabrike kèk mwa avan lansman atak lame Irak sou vil Mosoul rive nan plizyè dizèn milye. Dapre CAR, materyo pou pwodui zam sa yo te soti nan peyi Tiki.