Accessibility links

Eleksyon nan Soudan: Re-Eleksyon Al-Bashir Garanti.

  • Ekip Sèvis Kreyòl VOA

Prezidan Omar Hassan al-Bashir ap jete bilten li nan yon biwodvòt nan vil Khartoum, nan jounen lendi 13 avril 2015 la.

Eleksyon jeneral ap dewoule lendi 13 avril 2015 la nan peyi Soudan kote obsèvatè yo atann yo aske elektè yo bay prezidan an plas, Omar al-Bashir, yon lòt manda. Vrèman vre, pati ki sou pouvwa a, Pati Kongrè Nasyonal la, byen plase pou l ranpòte laviktwa, paske prensipal pati opozisyon yo deside boykote eleksyon an.

Frederica Mogherini, chèf politik entènasyonal Inyon Ewòp la, fè konnen eleksyon sa a pa kapab bay rezilta ki merite konfyans, paske li pap gen lejitimite atravè tout peyi a. Prezidan Komisyon Elektoral Endepandan an, Pwofesè Mouktar al-Assam, demanti kritik sa a. Nan yon entèvyou ak Lavwadlamerik, li di opozisyon an te fè pati palman ki te fòme komisyon elektoral la e eleksyon yo pral dewoule yon fason onèt e kredib pou tout moun. Misye Al-Assam di:

« Eleksyon an ap lib e onèt, paske tout kandida gen dwa voye reprezantan yo nan biwodvòt yo kote yo ka rete bò kote bwat-bilten yo jiskaske nou anonse rezilta yo. Alòs, pa gen mwayen pou eleksyon sa a pa lib, onèt e demokratik. »

Prezidan Al-Bashir pwomèt lapè, devlopman ak amelyorasyon kondisyon ekonomik yo nan Soudan nan moman yon afè de 13 milyon elektè pare pou yo patisipe nan premye eleksyon kap dewoule nan peyi a depi li te separe ak Soudan Sid an 2011. Akoz separasyon sa a, Soudan Sid genyen lakay li yon gwo majorite resous petwolye ki te sou tèritwa ansyen Soudan an.

XS
SM
MD
LG