Accessibility links

Deba sou Plan-Akò Gwoup 6 la Jwenn sou Pwogram Nikleyè Iranyen an.

  • Ekip Sèvis Kreyòl VOA

Premye Minis izrayelyen an, Benjamin Netanyahu, pandan li tap fè yon diskou nan Jerizalèm sou plan-akò Iran jwenn ak Gwop 5+1 an (Foto: Premye avril 2015).

Prezidan Barack Obama deklare plan-kad pou yon akò sou pwogram nikleyè Iran an, ki kapab leve sanksyon kap peze sou do Teheran an, se pi bon mwayen lontan pou anpeche Iran devlope yon zam nikleyè.

Nan yon entèvyou Misye Obama bay jounal New York Times, li di si yo ta tou senpleman kontinye kite sanksyon yo sou do Iran, sa tap kite lemond san mwayen pou l konnen sa Iran ap fè ap pwogram nikleyè li a; dayè, dapre prezidan ameriken an toujou, sèl rezilta yon atak militè, se tap sèlman ralanti Iran sou kous li pou l konstwi yon zam nikleyè, paske finalman sa tap pouse peyi a prese chache mwayen pou l posede bonm nan.

Bò kote pa l, Premye Minis izrayelyen an, Benjamin Netanyahu, ki tap patisipe nan pwogram Meet The Press, ki pase chak dimanch sou chèn televizyon NBC, kontinye montre opozisyon fawouch li kont plan-akò Lozàn nan. Daprè misye Netanyahu, antant sa a kite Iran avèk yon gwo kokenn enfrastrikti nikleyè ki pral debouche san mank sou fabrikasyon yon bonm.

Anfen, pandan pap Franswa tap priye nan okazyon dimanch Pak la nan Vatikan, li atire atansyon sou sa Prezidan Barack Obama konsidere kòm yon evennman istorik ki dewoule nan peyi Laswis jedi 2 avril pase a. Souvren Pontif la deklare :

"Avèk gwo espwa, nou mete konfyans nou nan Seyè plen pitye a dekwa pou plan-akò yo jwenn nan vil Lozàn nan kapab reprezante yon wout definitif ki pral debouche sou plis sekirite ak plis fratènite."

XS
SM
MD
LG