Accessibility links

Breaking News

Vizit Solidarite Sekretè Deta John Kerry an Frans


Majistra Pari a, Anne Hidalgo, ak Sekretè Deta John Kerry, ap aplodi chantè James Taylor ki bay yon pèfòmans nan otèl-de-vil kapital Lafrans la. (Foto: 16 janvye 2015).

Sekretè Deta ameriken an, John Kerry, ap vizite vil Pari, kapital peyi Lafrans, kote li depoze yon jèb flè nan 2 anplasman kote militan islamik te lanse yon atak mòtèl semèn pase a. Pi gwo diplomat ameriken an ap fè vizit sa a pou l montre solidatite Lèzetazini ak Lafrans aprè trajedi ki te kòmanse mèkredi 7 janvye pase a e ki te koze lanmò 17 moun.

Pou kòmanse, misye Kerry ak minis afè etranjè fransè a, Laurent Fabius, parèt ansanm nan yon supermaché nan pati lès vil Pari, kote 4 moun te mouri nan yon priz-dotaj sa gen 8 jou. Aprè sa, 2 ofisyèl yo vizite lokal jounal satirik Charlie Hebdo kote 12 moun te pèdi lavi yo nan jounen mèkredi 7 janvye a. La tou, menm jan ak nan supermaché a, moun te ka wè yon bann jèb flè, kouwòm ak yon pil lòt objè-souvni ki monte men wòtè e ki rann viktim yo omaj, an fas yon kòdon polisye ki te la pou asire sekirite a.

Aprè 2 vizit sa yo, Misye Kerry patisipe nan yon seremoni ki dewoule nan lokal mèri Pari a, a kote majistra vil la, Anne Hidalgo. Chèf diplomasi amerikèn nan pran lapawòl an angle e an fransè pou l di atak ki te fèt an Frans semèn pase a se –nap site «Yon atak moun lach e mèprizab, Ameriken yo reyaji ak kondanasyon. Rezilta atak sa yo se ranfòse plis toujou detèminasyon Lèzetazini ak Lafrans pou yo defann libète, laverite ak lanmou, epi kondane lahèn. »

--------------------------------------------------------

Ann Ewòp toujou e toujou sou dosye teworis la :

A.- Nan peyi La Bèljik, otorite yo ogmante alèt kont zak teworis la pou mete l nan nivo maksimòm nan. Gouvènman bèlj la pran desizyon sa a aprè lapolis te anonse yo rive dejwe sa yo rele « yon atak teworis iminan », sètadi ki te prèt pou reyalize. Yo dejwe li ak yon desant-dé-lye kote yo touye 2 nèg ki te ame jous nan dan epi yo arete yon lòt.

B.- Ann Almay, lapolis fè konnen yo poze arestasyon 2 nèg nan vil Bèlen, kapital la, sou akizasyon deske yo tap rekrite moun pou y al batay bò kote militan Gwoup Eta Islamik la nan peyi Siri ak Irak. Otorite yo di yo arete 2 mesye yo vandredi 16 janvye 2015 la aprè yon seri desant-dé-lye ki te gen patisipasyon plis pase 200 ajan-d-polis nan 11 batiman nan kapital Almay la.

XS
SM
MD
LG