Accessibility links

Selebrasyon 70èm Anivèsè Debakman Fòs Alye yo nan Nòmandi, an Frans.


Prezidan Barack Obama ak lidè fransè a, Francois Hollande, ap pase devan veteran yo ak lòt moun kap paticipe nan seremoni kap make 70èm anivèsè Jou J a. (Colleville-sur-Mer, Frans, 6 Juen 2014).
Prezidan ameriken an, Barack Obaman, rann omaj pou veteran 2èm Gè Mondyal la nan yon seremoni ki dewoule an Frans pou make 70èm anivèsè Jou J a, swa jou kote fòs zalye yo te debake sou plaj Nòmandi a pou yo te lanse operasyon militè ki ta pral debouche sou defèt Lalmay nazi a.

Nan yon mesaj Prezidan Obama prezante sou Plaj Omaha, nan Nòmandi, nan kòmansman jounen an, li wete chapo li devan twoup militè ki, daprè sa l di –nap site: “Fè tèlman sakrifis pou prezève libète nan yon peryòd kote lemond te anba tèlman menas ak danje,” fen sitasyon.

Anviwon 160 mil sòlda alye te desann nan parachit –oubyen yo te vwayaje nan bato-anfibi-- pou yo debake sou plaj Nòmandi a nan dat 6 jen 1944, pou yo te lanse sa ki pase nan listwa kòm pi gwo aso militè lòm jan wè sou latè. Menmsi yon afè de 4 mil 500 nan yo te pèdi lavi yo menm anvan jounen an te fin pase, operasyon an te fin pa bay fòs alye yo laviktwa ann Ewòp. Nan mesaj prezidan Obama a, li rann omaj pou veteran ki te patisipe nan operasyon Jou J a e ki te fin pa chanje kous listwa limanite; daprè lidè ameriken an, li enpòtan pou istwa veteran sa yo rete grave nan memwa jenerasyon kap vini yo. Misye Obama di:

“Se yon onè pou mwen pou m retounen isit la Jodi a pou m rann omaj pou fanm ak gason sa yo ki te defye tout kalte danje ; pami yo genyen veteran Jou J a. E map di yo : “Mesye-dam, se avèk anpil imilite mwen kanpe devan prezans nou jodi a.”

Nan menm seremoni an, prezidan fransè a, François Hollande, pran lapawòl pou li rann omaj, li menm tou, pou travay ekstwòdinè fanm ak gason ki te patisipe nan operasyon Jou J a te reyalize pou yo chanje listwa dimond. Lidè fransè a di sakrifis yo te fè pou libète, fè yo merite rekonesans tout moun kap viv jounen jodi a nan yon peyi lib, lwen diktati ak move konsekans yon sistèm diktatoryal.

Plizyè milye veteran 2èm Gè Mondyal la ap patisipe nan seremoni kap dewoule sou Plaj Nòmandi a. Pi fò nan yon gen plis pase 90 zan. Anpil nan yo pale pou di, a laj sa a se yon gwo satisfaksyon pèsonèl pou yo la toujou pou yo gade solèy la ki tap leve sou Plaj Nòmandi a. Lidè 18 peyi reponn prezan nan seremoni sa a.
XS
SM
MD
LG