Accessibility links

Venezuela/Politik : Lidè Opozisyon an Lajistis Tap Chache, Rann Tèt li bay Otorite yo.

  • Ekip Sèvis Kreyòl VOA

Lid opozisyon Leopoldo Lopez, ki abiye an blan avèk yon branch flè nan men li, tonbe anba men Gad Nasyonal Bolivaryèn nan, nan Caracas, Venezuela. (Foto: 18 fevriye 2014).
O Venezuela, lidè opozisyon an, Leopoldo Lopez, kite kachèt li madi 18 fevriye 2014 la pou l pran lapawòl nan yon manifestasyon anti-gouvènmantal anvan li rann tèt li bay otorite yo.

Misye Lopez, ki gen 42 zan e ki te fè etid inivèsitè li nan youn nan pi gwo lekòl siperyè Ozetazini (an palan de Univèrsite Harvard, kote li te dekwoche yon diplòm nan ekonomi), pran tèt yon gwo mouvman leve-kanpe kont gouvènman Prezidan Nicolas Maduro-a. Se konsa otorite yo lanse yon manda darè kont li pou asasina ak teworism, paske gen moun ki mouri nan manifestasyon sa yo –pi fò nan viktim sa-yo se patizan opozisyon an

Misye Lopez fè konnen li pran desizyon pou l rann tèt li bay otorite yo yon fason pou l ouvè je lemond antye sou yon gouvènman venezuelyen kap monte plis chak jou sou wout diktati a. Lidè opozisyon an di:
“Nap viv kèk moman difisil kote gouvènman an ap rekonpanse moun kap vyole lalwa, epi li vle voye nan prizon sitwayen venezuelyen kap chache pote chanjman nan lapè, demokratikman, daprè sa k di nan konstitusyon nou an.”

Nicolas Maduro akize Leopoldo Lopez deske lap chache pran tèt pèp la pou fè lpoze zak vyolans, epi deske li nan tèt yon konplo (ke Lèzetazini apiye) pou l chache wete li menm, Prezidan Maduro, sou pouvwa a.
XS
SM
MD
LG