Accessibility links

2èm Tou Eleksyon Prezidansyèl ak Palmantè sou Lil Madagaskar

  • Ekip Sèvis Kreyòl VOA

Nan Lil Madagascar, elektè yo ap retounen nan biwodvòt yo, vandredi 20 desanm 2013 la, pou yo eli yon nouvo prezidan. Popilasyon an espere nouvo gouvènman an pral kapab mete fen nan yon kriz ekonomik e politik ki la depi 5 kan sou il sa a ki nan mitan Oseyan Endyen an e kote majistra kapital la, Antananariv, te dechouke yon prezidan eli an 2009. Se yon 2è tou eleksyon k ap dewoule aprè yon premye manch ki te fèt nan dat 25 oktòb pase a, kote rezilta yo pat bay yon venkè klè.

Eleksyon prezidansyèl 20 desanm nan mete fas a fas Richard Jean-Louis Robinson, yon ansyen minis sante piblik nan gouvènman prezidan dechouke a, Marc Ravalomanana --misye Robinson te ranpòte 30 pou san vwa yo nan premye tou a; rival li se Héry Martial Rokotoarimanana, yon ansyen minis finans nan gouvènman tranzisyon ki sou pouvwa a e ki gen nan tèt li Andry Rajoe-Lina; misye Rokotoarimanana te ranpòte 15 pou san vwa yo nan premye tou a.

Tou lè 2 kandida yo di yo pral santre atansyon yo sou nesesite pou yo rebati ekonomi malgach la. Sepandan, analis politik Gilbert Raharizatovo fè konnen tou lè 2 mesye yo manke eksperyans ki nesesè a.

Misye Raharisatovo deklare: "Sa Madagaskar bezwen kounye a se yon nonm ki konn òganize; yon nonm ki gen vizyon. Se sa m ta rele yon òmdeta. Or, nan Madagaskar jounen jodi a, yon nonm konsa pa egziste, paske tou senpleman, nan opinyon pa mwen, yon òmdeta se yon nonm ki resevwa fòmasyon pandan lontan pou l konnen sa ki rele « etik bòn gouvènans."

An plis yon nouvo prezidan, pèp malgach la ap vote vandredi pou l chwazi tout manm palman an.
XS
SM
MD
LG