Accessibility links

Breaking News

Etazini-Prezidansyèl: 4 Kandida Repibliken yo Patisipe nan Yon Lòt Deba anvan 3èm Sipè Madi a.


Kandida a la prezidans pou pati repibliken an. De goch a dwat: Sen. Marco Rubio (R-Fla), Donald Trump, Sen. Ted Cruz (R-Tegzas) ak Gouvènè Eta Ohio a, John Kasich, kanpae kòt-a-kòt pandan yo tap koute Inm Nasyonal ameriken an anvan deba te kòmanse nan sware jounen jedi 10 mas 2016 la nan Inivèsite Miami an, nan vil Coral Gables, Eta Florid. (Foto: AP/Wilfredo Lee).

Mouvman radikal islamik la, politik nasyonal, politik entènasyonal ak komès, se kèk nan tèm ki te nan deba ki dewoule nan sware jounen jedi 10 mas 2016 la ant 4 kandida ki rete nan kous pou nominasyon pati republiken an: Milyadè Donald Trump; Senatè Eta Florid la, Marco Rubio; Senatè Eta Tegzas la, Ted Cruz; ak gouvènè Eta Ohio a, John Kasich te pataje podyòm nan pou twoke lide sou pwoblèm nasyonal ak entènasyonal yo nan Inivèsite Miami an, nan Eta Florid.

Deba sa a fèt 5 jou sèlman anvan eleksyon primè ki gen pou dewoule nan Eta Florid, Ilinwa, Ohio, ak 2 lòt Eta plis yon lòt kote se yon “caucus” ki pral dewoule. Rezilta eleksyon sa yo kapab byen bay kandida ki devan nan kous la, Donald Trump, yon avans solid –sinon enbatab- nan kantite delege li genyen yo.

Si Marco Rubio pèdi Florid –Eta li reprezante nan Sena a-- devan Donald Trump, se tap yon gwo anbara pou li e sa ta kapab vle di fen kanpay la pou li. Sondaj ki te fèt imedyatman anvan deba jedi a, montre Trump devan nan Florid; ansuit nou jwenn Rubio ak Cruz.

Anfen, nouvèl ki sòti nan fen jounen jedi a fè konnen doktè chirijyen, kadyològ e ansyen kandida a la prezidans pou Pati Repibliken an, Ben Carson, anonse li pral andose kandidati Donald Trump pou pòs Prezidan Lèzetazini an, menmsi Trump te di move bagay sou li pandan kanpay la. Efektivman, nan yon konferans pou laprès 2 mesye yo bay nan matine jounen vandredi a, Carson deklare lap apiye Trump paske “li genyen sa ki nesesè pou l chanje Lèzetazini.”

XS
SM
MD
LG