Ozetazini, 2 kandida a la prezidans yo, Demokrat Hillary Clinton ak Repibliken Donald Trump, te kontinye ranfòse kanpay yo mèkredi 2 novanm 2016 la mwens ke yon semèn anvan eleksyon an ki gen pou dewoule madi 8 novanm pwochen an. Youn lanse gwo atak sou lòt la kote chak di kandida rival la pa kalifye pou l tounen pwochen prezidan Lèzetazini.
Misye Trump, ki tap mennen kanpay nan Eta Florid, di si ameriken yo kite Madan Clinton al okipe La Mezon Blanch, sa tap kreye “yon kriz konstitisyonèl san parèy ki ta ka koute peyi a trè chè, menm nan lavni..." . Depi kòmansman semèn nan, se chak jou Donald Trump ale nan Florid, yon Eta li di li pa kapab pèdi si l vle tounen pwochen prezidan ameriken an.
Pandansetan Hillary Clinton, ki te fè yon kout-pye rapid nan Florid nan fen jounen madi a, lanse sou Misye Trump yon ti toya kote li deklare, antwòt, kandida repibliken an se yon nèg ki abitye maltrete fanm. Se konsa kanpay Clinton nan atire atansyon elektè yo, yon fwa ankò, sou yon videyo yo te anrejistre nan lane 2005 Donald Trump ap bat lestomak li kòm “yon machoman ki gen dwa manyen medam yo kote li pa dwe manyen yo, e fi yo pap di anyen paske li se yon gwo vedèt televizyon.”
Dènye sondaj yo montre kous la ap vin trè sere nan kèk Eta-kle tankou Florid, Pennsilvani, Michigan ak Arizona.