Nouvèl yo rapòte, Anbasadè ris la nan Ankara Andrei Karlov pèdi lavi li nan yon atak nèg ak zam fè sou li nan kapital peyi Tirki a jounen lendi 19 desanm 2016 la. Yo te kouri lopital ak victim nan, men li pat rive chape.
Pòtpawòl ministè afè etranjè ris la Maria Zakharova konfime nouvèl lanmò anbasadè Karlov. Daprè pòtpawòl la, anbasadè a mouri anba blesi li te resevwa nan atak la.
Pandan yon rankont an piblik ki tap fèt nan Ankara, yon endividi moun pa rive idantifye te louvre kout zam e anbasadè a resevwa yon bal.
Atak la te fèt pandan anbasadè Karlov tap patisipe nan yon ekspozisyon foto ke anbasad Larisi nan Tirki finanse e ki rele, “ Kouman Larisi wè Tirki.”
Genyen chèn televizyon nan Tirki ki fè konnen lapolis tire e touye asayan an.