Accessibility links

Breaking News

Sou Ajanda Asanble Jeneral l’ONU an pou Sesyon 2011 la: Kreyasyon yon Eta Palestinyen ki Manm Òganizasyon an


Lidè palestinyen an, Mahmoud Abbas
Lidè palestinyen an, Mahmoud Abbas

Youn nan pwen ki sou ajanda Asanble Jeneral Oganizasyon Nasyon Zini an pandan lidè mondyal yo reyini pou 66èm sesyon anyèl òganizasyon an, se kreyasyon yon Eta palestinyen ak posiblite pou Eta sa a tounen manm l’ONU.

Sou dosye sa a, Premye Minis izrayelyen an, Benjamin Netanyahu, lanse apèl pou l mande negosyasyon dirèk avk lidè palestinyen an, Mahmoud Abbas. Misye Abbas, ki twouve l nan Nouyòk pou sesyon l’ONU an, deja soumèt devan sekretè jeneral Ban Ki-moon plan li genyen sou kreyasyon eta a e sou posiblite pou l jwenn yon plas nan òganizasyon mondyal la.

Lendi 19 septanm 2011 la, pandan Sekretè Deta Hillary Clinton t ap pale ak laprès, li di Lèzetazini tou mande pou 2 pati yo (Izrayèl ak Pouvwa Palestinyen an) rekòmanse negosyasyon yo.

Chèf diplomasi amerikèn nan di:

“Mwen panse li bonè toujou nan semèn nan; gen anpil moun ki poko rive isit la; anpil gwoup diferan reyalize yon gwo kantite rankont kote yo youn pale ak lòt; e m ta renmen genyen tout enfòmasyon posib sou diferan konvèsasyon sa yo. Men mwen panse tout moun deja konnen pozisyon nou: san di pètèt, nou an favè solisyon ki mande egzistans 2 Eta a ; e se pou sa nou pral kontinye travay. “

Bò kote pa l, minis afè etanjè Lafans la, Alain Juppé, ki t ap abòde youn nan tèm diskisyon ki pral domine 66èm sesyon anyèl l’ONU an (an palan de posiblite pou yon Eta palestinyen vin manm òganizasyon mondyal la), Misye Juppé pale pou l di lide sa a pa prale twò lwen nan Konsèy Sekirite a, puiske Lèzetazini deja di l ap poze veto l sou plan an.

Misye Juppé di:

“Si palestinyen yo ale nan Konsèy Sekirite a, rezolisyon an pap pase natirèlman; e nou konnen pou kisa : petèt pap genyen 9 vwa ki nesesè pou rezolisyon an pase; e menm si ta genyen 9 vwa, gouvènman ameriken an deja anonse li pral poze veto l sou rezolisyon an. Alòs pwojè a pap genyen okenn bon rezilta.”

XS
SM
MD
LG