Accessibility links

Breaking News

Saif al-Islam Kadhafi, di : “Tripoli Toujou Anba Kontwòl Gouvènman Kadhafi a.”


Pitit Kadhafi a, Saif al-Islam Kadhafi

Yon pitit-gason lidè Libyen an Kolonèl Mohammar Kadhafi -an palan de Saif al-Islam Kadhafi, yo te konsidere kòm moun ki ta pral eritye pouvwa a nan men papa li --parèt nan televizyon byen bonè nan jounen madi 23 out 2011 la, avèk pawòl defi nan bouch li, kote misye fè konnen se gouvènman Kadhafi a ki toujou ap kontwole Tripoli, kapital la, nan moman rebèl yo pale pou yo di pi fò vil la tonbe nan men yo.

Jèn Kadhafi a di:

"Nou isit la. Se peyi nou. Moun sa yo se moun nou, e nou pral viv e mouri isit la. Viktwa a se pou nou l ye, paske pèp la avèk nou; se pou sa nou pral ranpòte laviktwa. Voye je gade moun yo ; gade yo byen ; yo nan lari yo, yo tout kote. "

Aprè deklarasyon sa a, Saif al-Islam te pran tèt yon konvwa pou l fè yon toune nan zòn kote lafanmi Kadhafi genyen patizan n yo nan Tripoli; televizyon montre misye k ap leve men n anlè, pwen n mare -ki se yon sign defi- pandan patizan n yo t ap bat bravo.

Pandansetan, youn nan lidè opozisyon an e manm Konsèy Nasyonal Tranzisyon an ke mouvman rebèl la mete sou pye –n ap pale de Mustafa Abdel Jalil- rekonèt le fèt ke jiskaprezan rebèl yo poko pran kontwòl tout kapital la kote fòs ki fidèl ak kolonèl Kadhafi ap livre konba ak rebèl yo nan kèk pòch rezistans izole. Sepandan, menm patizan rejim Kadafi a rekonèt se tout kapital la ki preske tonbe nan men rebèl yo. Youn nan patizan sa yo deklare:

“ Revolisyonè yo preske kontwole tout Tripoli; pi fò vil la tonbe anba men yo. Sa ki nan men nou, se sèlman rezidans Kadhafi a, Bab al-Aziziya. Se zòn sa a sèlman ki nan men nou.”

Dènye nouvèl yo fè konnen, an plis kèk pati nan Tripoli ki anba men fòs pro-Kadhafi yo, yo genyen tou kontwòl o-mwen 2 lòt gwo vil ki gen bon rapò ak tribi kote kolonèl Kadhafi sòti a: an palan de vil Sabbah, ki nan pati sid Libi, avèk Sirte, ki sou yon distans 450 kilomèt a lès Tripoli. Kèk sous militè ameriken fè konnen fòs gouvènmantal ki nan vil Sirte yo te tire o-mwen yon misil scud lendi 22 out 2011 la; pa gen rapò ki pale de moun ki ta blese.

XS
SM
MD
LG