Prezidan Barak Obama pral fè rankont separe nan Nouyòk, mèkredi 21 septanm 2011 la, avèk kòlèg palestinyen li, Mahmoud Abbas, e ak Premye Minis izrayelyen an, Benjamin Netanyahu, nan kad efò Lèzetazini ap deplwaye pou l evite yon chòk diplomatik ant 2 pati yo nan Nasyon Zini.
Misye Abbas pran tèt yon kanpay pou wè si l’ONU ta rekonèt yon Eta palestinyen, malgre efò divès eta-manm òganizasyon mondyal la ap fè pou dosye a pa ale devan Konsèy Sekirite a.
Administrasyon Obama a pran angajman pou l poze veto l sou yon plan konsa, pandan l ap fè efò pou wè si Prezidan Abbas ak Premye Minis Netanyahu ta retounen bò tab negosyasyon yo.