Sekretè jeneral l'OTAN an, Jens Stoltenberg, di “se yon lòt vyolasyon sovaj rezolisyon l'ONU yo e se yon menas grav pou lapè ak sekirite entènasyonal.”
Oganizasyon Trete Atlantik Nò (L'OTAN) lanse apèl pou l mande manm kominote entènasyonal la mete ansanm pou yo bay Kore di Nò yon repons pou yon dènye tès misil peyi sa a fèk reyalize.
Sekretè jeneral l'OTAN an, Jens Stoltenberg, ki tap reyaji sou evennman an sou kont twitter li vandredi 15 septanm 2017 la, deklare:
“Lansman misil Kore di Nò fèk fè a se yon lòt vyolasyon sovaj rezolisyon l'ONU yo. Se yon menas grav pou lapè ak sekirite entènasyonal e sa egzije yon repons bò kote tout kominote entènasyonal la.”
Nan kòmansman jounen vandredi a, Kore di Nò te lanse yon lòt misil ki pase sou tèritwa peyi Japon. Sa rive 2 zou 3 jou sèlman ape Nasyon Zini te enpoze plis sanksyon sou Pyongyang poutèt li te reyalize yon 6èm tès nikleyè.