Accessibility links

Breaking News

7 Manm Kongrè Etazini Mande Biden pou l Sispann Apiye PM Ayisyen Ariel Henry


Premye Minis Ayisyen Ariel Henry pwononse yon diskou nasyonal nan Potoprens, Ayiti, 7 Fevriye 2022.

Yon gwoup 7 depite La Chanm dè Reprezantan Etazini mande Prezidan Joe Biden Mèkredi pou l sispann apiye Premye Minis Ayisyen an Ariel Henry. Yo di Henry pa gen lejitimite nesesè pou oganize eleksyon peyi a bezwen fè pou rezoud kriz politik la.

Depite Ayisyèn Amerikèn Sheila Cherfilus-McCormick dirije jefo sa a, e li deklare nan lèt gwoup la voye bay prezidan an ke Etazini ta dwe apiye pito jefo kap fèt pou kreye yon gouvènman tranzisyon. Depite Cherfilus-McCormik se yon Demokrat ki reprezante eta Florid nan Kongrè a.

"Nou mande ak imilite pou administrasyon w pèmèt pèp Ayisyen an detèmine desten politik li poukont li, epi wetire sipo nap bay gouvènman de-fakto a," lèt la di. Tout depite ki siyen li se Demokrat yo ye.

Foto Achiv: Sheila Cherfilus-McCormick tann rezilta eleksyon an nan Lauderhill, Florid, 5 Nov. 2021.
Foto Achiv: Sheila Cherfilus-McCormick tann rezilta eleksyon an nan Lauderhill, Florid, 5 Nov. 2021.

Madan Cherfilus-McCormick deklare pou fè fas ak pakèt migran Ayisyen kap chache antre Ozetazini yo, fok yo jere kriz politik Ayisyèn nan, ki mete peyi a tèt anba depi asasina Prezidan Jovenel Moise nan mwad Jiyè 2021.

"Si nou gade rezon ki dèyè (migrasyon an) vreman vre nou wè se yon kestyon enstabilite politik ki lakoz krim ogmante ann Ayiti, Madan Cherfilus-McCormick di ajans nouvèl Reuters nan yon entèvyou pa telefon.

Ariel Henry te vinn premye minis yon ti tan apre Moise te mouri. Li pwomèt pou l oganize eleksyon men li pa fè anpil pwogrè pou kreye yon konsèy elektoral - yon etap esansyel pou oganize eleksyon.

VOA Kreyol mande reyaksyon Lamezonblanch sou lèt la men nou poko jwenn repons.

Administrasyon Biden nan pa montre okenn siy ke li pare pou l abandone Henry. Sekretè d'Eta Adjwen pou Zafè Emisfè Oksidantal yo, Brian Nichols dekri Henry mwa pase a kom "jeran gouvènman an."

Yon gwoup sosyete sivil Ayisyen ki rele tèt li "Ako Montana" ki gen ladann ekonomis, jounalis ak ansyen politisyen, lanse apel bay Henry pou l remèt pouvwa a bay yon gouvènman pwovizwa ki ta dirije peyi a pandan 2 zan e ki ta travay pou amelyore sityasyon ensekirite a.


Gwoup sa a di Ayiti paka oganize eleksyon lib pandan ke gang yo gen kontwol anpil rejyon peyi a, e ke yon eleksyon anba sikonstans aktyèl yo riske ogmante pouvwa gang yo.

XS
SM
MD
LG