Lidè peyi Etazini ak Ostrali anonse yo siyen yon akò ki pral pèmèt twoup militè ameriken al pran pozisyon sou tèritwa ostralyen an. Vrèman vre, Prezidan ameriken an, Barack Obama, k ap vizite Ostrali, bay ansanm avèk premye minis ostralyen an, Julia Gillard, yon konferans pou laprès kote 2 lidè yo bay jounalis yo detay sou akò a.
Madam Gillard di:
“Ostrali byen pare pou l resevwa plizyè gwoup mèrin kap genyen ladan yo ant 200 a 250 manm ki pral pran pozisyon nan Tèritwa Nò a kote y ap kapab rete pandan 6 mwa. Pandan ane yo ap pase, nou gen plan pou n ranfòse relasyon sa a jiskaske twoup yo va rive nan yon efektif 2 mil 500 zòm konsa. Se yon fòs ki pral kapab mennen aksyon total-kapital ni anlè, ni atè."
Premye minis Gillard ajoute akò a pral pèmèt avyasyon militè Lèzetazini itilize baz ayeryen peyi Ostrali. Bò kote pa l, Prezidan Obama deklare akò a pral bay Lèzetazini plis fasilite pou l lanse operasyon imanitè e satisfè bezwen moun ki viktim dezas natirèl nan rejyon Azik-Pasifik la, menm jan sa pral ranfòse kapasite peyi a pou li fè fas ak defi ki ka poze nan domèn sekirite a.
Prezidan Obama deklare:
“Deplwaman sòlda sa a, kote yon gwoup mèrin pral ranplase yon lòt regilyèman, se yon bagay ki trè enpotan; paske, sa li pèmèt nou fè, se non sèlman ranfòse kapasite nou e resere kowoperasyon ant 2 peyi yo, men tou sa pral pèmèt nou satisfè egzijans yon kantite peyi asosye nan rejyon an ki bezwen antrènman, ki bezwen egzèsis. Yo ta renmen konnen Lèzetazini prezan pou l kenbe sekirite nan rejyon an.”
Prezidan Obama fini pa di akò amerikano-ostaralyen an pral rann li pi fasil pou fòs militè Lèzetazini antrene lame divès peyi ki nan rejyon Azik-Pasifik la, epi ekipe peyi ki pi piti yo yon fason pou yo kapab fè fas pi fasilman ak kriz ki ka poze lakay yo.
