Administrasyon Biden nan kòmanse ekspilse migran kiben ak nikaragweyen nan direksyon Meksik gras ak yonn règleman ki gen rapò ak pandemi e ki pèmèt otorite yo refize yon migran chans pou l fè demand azil Ozetazini; konsa yo elaji aplikasyon règleman an menm nan moman kote administrasyon an di piblikman l ap eseye elimine li.
Otorite ameriken yo te jwenn yon akò avèk Meksik pou yo ekspilse 100 kiben ak 20 nikaragweyen pa jou. Migran yo ap sòti nan vil sa yo: San Diego, El Paso, Rio Grande Valley, nan Tegzas, dapre yon ofisyel ameriken ki byen konnen dosye a.
Ekspilsyon yo te kòmanse 27 avril pase e yo pral pran fen 22 me, dapre sa ofisyel la di ajans nouvel The Associated Press a kondisyon pou non l pa site, paske akò a poko piblik. Dapre menm ofisyel la, Meksik pran an konsiderasyon lefèt ke gouvènman ameriken an rekòmanse ofri viza pou moun k ap viv Kiba. Meksik, li menm tou, rekòmanse bay viza pou Kiben yo.
