Sekretè Jeneral Lig Arab la, Nabil Elaraby, di Siri dakò pou resevwa nan yon vizit li ka fè semèn sa a nan moman otorite siryen yo ap kontinye yon operasyon sere-boulon yo lanse kont disidan politik yo atravè tout peyi a.
Misye Elaraby, ki t ap pale nan vil Le Kèr dimanch 4 septanm nan, fè konnen gouvènman siryen an di l ap byen resevwa li si l fè vizit la. Lidè Lig Arab la ajoute li pral fè otorite yo nan Damas konnen kè-sote peyi arab yo devan vyolans k ap sakaje Siri a –vyolans ki fè anpil mò deja-- e li pare pou l tande opinyon lidè siryen yo.
Sa gen yon semèn otorite siryen yo te rejte yon apèl Lig Arab la te lanse pou l mande yon fen nan vyolans la. Siri se yon manm Òganizasyon Pan-Arab la ki te bay Damas konsèy pou l mete fen nan larivyè san k ap koule nan peyi a anvan li twò ta.
Nasyonzini fè konnen plis pase 2 mil 200 moun pèdi lavi yo nan operasyon sere boulon rejim prezidan Bashar El-Assad la lanse depi mwa mas pase a lè manifestan te kòmanse mande refòm ak fen gouvènman gwo ponyèt Misye al-Assad ap dirije a.