Isit Washington, prezidan Donald Trump bay patizan li yo garanti kòmkwa yo pral byen kontan konnen ki moun l ap chwazi pou okipe yon pòs nan Kou Suprem nan, pi gwo tribinal peyi a, pou ranplase gran jij Anthony Kennedy ki anonse l ap pran retrèt li nan fen mwa jiyè a.
Pandan Misye Trump t ap patisipe nan yon dine an lonè manm Fòszame Lèzetazini yo mèkredi 4 jiyè a, li deklare:
"Mwen panse nou tout ki la a, nou pral kontan onn-pe-pli lè nou va konnen kilès mwen chwazi. Nou te pran 10 sou 10 avèk nominasyon dènye gran jij mwen te chwazi a, Neil Gorsearh; mwen ban nou garanti nou pral enpresyone anpil lè nou va konnen kilès m ap nonmen kòm nouvo jij la, paske fwa sa a se gwo lo a nou pral pran."
Nan kòmansman semèn sa a Misye Trump te rankontre ak 7 kandida pou pòs la –pami yo gen 6 ki deja ap tavay kòm kou dapèl, swa yon nivo pi ba pase Kou Suprèm nan- avèk Senatè Eta Utah a, Mike Lee.
Tout kandida yo se konsèvatè, sètadi yo gen opinyon ki konfòm ak pwomès prezidan an te fè elektè yo pandan kanpay 2016 la kote li te di, si jamè pèp la ba li yon chans pou l nonmen youn oubyen 2 manm Kou Siprèm nan ki pral rete nan pòs la avi, li t ap fè nominasyon ki ka fè balans la panche sou bò konsèvatè a nan Gran Tribinal la pandan plizyè jenerasyon.
Si Sena a konfime chwa Misye Trump la, moun sa a pral ranplase Jij Anthony Kennedy ki te anonse semèn pase a li pral pran retrèt li nan dat 31 jiyè kap vini la a.