Accessibility links

Kot Divwa : Gbagbo ap Pati Oubyen li pap Pati?

  • J. Lyonel Desmarattes

Kot Divwa : Gbagbo ap Pati Oubyen li pap Pati?

Nan Kotdivwa, Fòs ki fidèl anvè Alassane Ouattara ---ki jwenn rekonesans komunote entènasyonal-la kòm nouvo prezidan lejitim peyi-a-- eben, fòs sa-yo antoure rezidans prezidan sòtan an, Laurent Gbagbo jedi 7 avril 2011 la, aprè kèk lese-frape izole ki te dewoule ant 2 kan yo pandan nannuit leve nan maten.

Fòs pro-Ouattara yo lanse operasyon sa a yon jou apre yo te atake rezidans misye Gbagbo (ki abite nan yon kay fòtifye), men twoup k ap defann rezidans la te opoze yon rezistans djanm e mesye Ouattara yo te finn pa fè bak.

Jedi 7 avril 2011 la toujou, elikoptè militè fransè lanse yon operasyon kote yo sove anbasadè japonè a nan Kotdivwa, apre rezidans li te retwouve l nan mitan konfwontasyon ki t ap fèt ant 2 kan bejeran yo.

Minis afè etranjè fransè a, Alain Juppé, fè konnen Izrayèl tou mande Lafrans pote konkou l nan efò kap fèt pou ede diplomat li yo pati kite Kotdivwa. Mèkredi 6 avril 2011 la, fòs pwo-Ouattara yo te lanse yon atak sou rezidans Misye Gbagbo a, aprè prezidan sòtan an te refize aksepte defèt li epi rann tèt li.

Daprè kèk pwòch kolaboratè misye Ouattara, konbatan li yo resevwa lòd pou yo mete men sou Laurent Gbagbo tou vivan. Kotdivwa twouve l nan yon kriz politik depi mwa desanm 2010, lè misye Gbagbo re rejte rezilta eleksyon prezidansyèl novanm yo ki te montre ke majorite sitwayen ivwaryen yo chwazi Alassane Ouattarwa kòm nouvo lidè peyi a. Efò medyasyon entènasyonal ki fèt pandan plizyè mwa deja, pa rive pran tèt misye Gbagbo pou fè l kite pouvwa a pasifikman.

XS
SM
MD
LG