Komisyon Tom Lantos la, ki responsab dosye dwamoun nan Chanm Bas Kongrè ameriken an, te òganize yon seyans sou eta sitiyasyon dwamoun ann Ayiti nan apremidi jounen mèkredi 4 mas 2020 an. 2 ko-prezidan komisyon an, Depite James P. McGovern (2èm sikonskripsyon Eta Massachusetts), avèk Depite Christopher H. Smith (4èm Sikonskripsyon, Eta New Jersey), plis Depite Sheila Lee-Jackson (18èm Sikonskripsyon, Eta Tegzas), avèk Depite Jamie Raskin (8èm Sikonskripsyon Eta Maryland) te genyen pou swiv ekspoze manm 3 panèl sou jan sitiyasyon dwamoun nan prezante aktyèlman nan Peyi d Ayiti.
Pèsonalite ki te konpoze premye panèl la se: Goerges A. Fauriol, responsab wo-plase nan chapit ameriken Sant pou Etid Estratejik e Entènasyonal; Anthony Banbury, prezidan e direktè jeneral IFES (Fondasyon Entènasyonal pou Sistèm Elektoral), avèk Ellie Happel, direktris Haiti Project (Pwojè pou Ayiti) e manm ekip jiridik fakilte dwa Inivèsite New York la.
2èm panel la, menm jan avèk 3èm nan, te genyen yon sèl manm: Madam Paloma Adams-Allen, prezidan-direktris jeneral Inter-American Foundasyon, pou premye a; epi pou 3èm nan Madam Loune Viaud, direktris Zanmi Lasante, yon òganizsyon k ap travay nan divès sektè –sitou domèn sante a-- depi lontan deja nan Depatman Ploto Santral la ak Depatman Latibonit ann Ayiti,
Nou pwopoze entènot yo/telespektè yo/oditè yo yon repòtaj Lyonel Desmarattes.