Lidè peyi La Grand Bretay, Lafrans ak Lèzetazini fè konnen kowalisyon l’OTAN an pral kontinye kanpay militè li a kont Libi jiskaske kolonèl Mohammar Kadhafi kite pouvwa a.
Premye-minis britanik la, David Cameron, prezidan fransè a, Nicolas Sarkozy, ak prezidan ameriken an, Barack Obama, fè konnen si yo kite Kadhafi sou pouvwa a, se t ap yon trayizon konfyans pèp libyen an, e pa t ap gen padon pou yon bagay konsa.
Nan yon deklarasyon an tèt-ansanm 3 lidè yo publiye vandredi 15 avril 2011 la nan divès jounal entènasyonal, yo di: « Li enpansab pou yon moun ki te eseye masakre pwòp pèp li, kapab jwe yon wòl kèlkonk nan gouvènman pèp sa a ».
Youn nan pitit-fi misye Kadhafi yo, Aisha Kadhafi, defann papa l vandredi 15 avril 2011 la kote manmzèl rasanble plizyè santèn moun nan Tripoli, pi presizeman devan yon rezidans misye Kadhafi ke avyon militè ameriken te bonbade an 1986.