Accessibility links

Breaking News

Kolonbi-Eleksyon: Juan Manuel Santos Se Prezidan Eli


Prezidan Eli Kolonbi a, Juan Manuel Santos (nan mitan), ak madanm li, Maria Clemencia Rodriguez (a dwat).

Nan peyi Kolonbi, dimanch 20 jen an sete 2èm tou eleksyon prezidansyèl yo pou ranplase Alvaro Uribe. Juan Manuel Santos, ansyen minis defans nasyonal e kandida Pati Inite Nasyonal la (donk, pati prezidan Uribe a) ranpòte laviktwa ak yon gwo kokenn avans sou rival li, Antanas Mockus, ansyen majistra kominal vil Bogota e kandida Pati Vèt la. Misye Santos jwenn 69 pousan vwa yo, tandiske kandida Mockus ranpòte apèn 28 pousan sèlman.

Nan diskou prezidan eli a, Juan Manuel Santos, fè pou l aksepte viktwa a, li di pòt la ouvè pou tout sitwayen kolonbyen ki vle travay nan inyon pou yo devlope peyi yo; men kantapou rebèl gwoup FARC yo (Fòs Zame Revolisyonè Kolonbi), tan rekonsilyasyon an finn pase. Misye Santos –ki te kontinye pale ak patizan n yo-- fè yo konnen li dispose kontinye ak politik predesesè l la, prezidan Alvaro Uribe, tap aplike nan kèk domèn de fason pou l kontinye bati sou menm fondasyon ki la depi 8 tan an.

Kandida pèdan an, Antanas Mockus --ki se yon ansyen dwayen univèsite-- fè konnen li te mennen yon kanpay ki ouvri je kolonbyen yo sou anpil pwoblèm ki pat jwenn tout atansyon yo merite jiskela -- pwoblèm tankou menas kap peze sou anviwonnman an ak nesesite pou gen plis jistis sosyal nan peyi a; epi li te preche yon politik non vyolans.

XS
SM
MD
LG