Accessibility links

Palman Katalòyn nan Vote yon Rezolisyon ki Mande Endepandans Vizavi Lespay

  • Ekip Sèvis Kreyòl VOA

Manifestan ki te rasanble, nan jounen vandredi 27 oktòb 2017 la, devan palman rejyonal katalan an pandan sesyon kote kò lejislatif rejyonal la vote pou Katalòyn pran endepandans li vizavi Lespay e tounen yon repiblik lib e souvren. (Foto: AP/Emilio Morenatti).

Nan Katalòyn, palman an vote pou rejyon sa a pran endepandans li vizavi Lespay apre majorite palmantè yo vote pou yo apwouve yon rezolisyon ki mande fòmasyon yon asanble konstitiyant pou kreye yon repiblik endepandant. Aprè vòt sa a, se yon lapli aplodisman ki te genyen nan palman an kote delege yo te bay akolad epi chante im rejyonal katalan an.

Redaksyon rezolisyon sa a, ki mande pou rejyon an pran endepandans li nan men Lespay, se travay branch separatis ki pi radikal nan kowalisyon rejyonal ki gen nan tèt li prezidan Katalòyn nan, Carles Puigdemont. Dokiman an pase ak yon vòt 70 pou, 10 kont epi 2 vòt blan.

Reprezantan pati sant-dwat ki sou pouvwa a ann Espay, Pati Popilè a, avèk opozisyon sosyalis la (ki, a yo 2, genyen mwatye syèj yo nan palman katalan an), te boykote sesyon an. Rezolisyon sa a, ki pase nan palman rejyonal la nan jounen vandredi 27 oktòb 2017 la, vin mete fen nan yon peryòd kote dout tap plane sou pwojè endepandans Katalòyn nan, yon pwojè ki te kenbe obsèvatè yo nan sispens depi dat premye oktòb 2017 la, jou kote yon referendum sou endepandans la te dewoule avèk patisipasyon 50% elektora a. 90 % moun ki te patisipe yo te vote pou Katalòyn separe avèk Lespay.

XS
SM
MD
LG