Accessibility links

Breaking News

8 Mas 2016: Jounen Entènasyonal Medam yo / Yon Koudèy sou Dwa Fanm yo ann Ayiti


Nan okazyon Jounen Entènasyonal Medam yo, plizyè milye fanm pran lari nan vil Maniy, kapital Filipin, pou yo reklame dwa yo.

Nan okazyon Jounen Entènasyonal Medam yo” madi 8 mas 2016 la, Oganizasyon Entènasyonal Travay (OET) pibliye yon rapò kote li di jiskaprezan efò kap fèt pou medam kap travay yo jwenn menm tretman ak mesye yo, se efò ki poko bay rezilta. Tit rapò a se: “Fanm nan travay – Men tandans yo pandan ane 2016 la.” Daprè sa OET di nan dokiman an, plizyè milyon fanm a travè lemond pa jwenn menm kalite travay, travay ki peye yo menm kòb ak gason yo.

Rapò a te pran an konsiderasyon sitiyasyon ki prezante nan 178 peyi kote tablo a gen plizyè kwen sonb ladan n pou sa k konsènen eta travay medam yo. Toujou genyen yon gwo diferans nan kantite fanm ak gason kap travay, salè 2 gwoup yo touche ak pwoteksyon yo resevwa nan lasosyete. OET di pa tèlman gen gwo chanjman pandan 20 tan ki pase yo. Sepandan, pandan menm peryòd la, medam yo fè gwo pwogrè nan domèn edikasyon an; men malerezman sa pa sèvi pou amelyore kondisyon travay fanm yo; e yon gason ki nan chomaj gen plis chans pou l jwenn travay pase yon fi ki pap travay.

Daprè rapò a toujou, puiske medam kap travay yo touche mwens kòb pase yon gason kap fè menm travay la, fanm yo pèdi nan benefis yo ta dwe resevwa pou sekirite sosyal, asirans vyeyès ak pansyon. An tèm jeneral, fanm yo reprezante 65 pousan moun ki atenn laj retrèt yo e ki pap touche okenn pansyon. Sa vle di, nan peyi kote yo te fè rechèch pou etid la, genyen anviwon 200 milyon fanm granmoun ki pap resevwa okenn lajan pansyon oubyen retrèt, tandiske kantite gason ki nan sitiyasyon sa a se 115 milyon.

PLIS RESPE POU DWA MEDAM YO ANN AYITI

Ann Ayiti, plizyè òganizasyon fanm leve lavwa pou yo denonse le fèt ke okenn fanm pa eli nan palman an nan eleksyon ki te dewoule sa pa gen lontan nan peyi a. Marie Frantz Joachaim, youn nan dirijan òganizasyon SOFA ki pale ak Lavwadlamerik nan okazyon Jounen Entènasyonal Medam yo-- lonje dwèt sou sa li rele “move mannèv ki te fèt nan koulis, anba chal, pou anpeche medam yo antre nan palman an”.

please wait

No media source currently available

0:00 0:01:42 0:00

Daprè Madam Joachim, sa vyole konstitisyon peyi a ki mande pou 1/3 nan moun kap travay nan administrasyon piblik la se fanm. Li lanse apèl bay manm konsèy elektoral gouvènman pwovizwa a pral fòme a, pou l pran tout dispozisyon pou l anpeche sa repete.

JOUNEN ENTENASYONYAL MEDAM YO NAN DYASPORA A

Nan dyaspora a –pi presizeman nan vil Miami, nan Eta Florid- plizyè òganizasyon fanm mete divès aktivite sou pye pou yo make Jounen Entènasyonal Medam yo. Depi samdi 5 mas 2016 la, “Fanm nan Miyami” te òganize yon gwo gala pou l make 25èm anivèsè fondasyon li. Sete yon okazyon pou Marleine Bastien –kap dirije òganizasyon sa a-- prezante bilan aksyon “Fanm nan Miyami” poze pou l defann koz kominote ayisyèn nan epi soulaje kè-sote imigran ki bezwen asistans lè yo fèk antre nan peyi Etazini.

please wait

No media source currently available

0:00 0:02:04 0:00

Bò kote pa l, Guylène Berry, ki gen lontan depi lap anime yon pwogram kominotè, pale ak Lavwadlamerik pou l atire atansyon sou sa li rele “wòl enpòtan medam yo jwe nan kominote a.” Li fè konnen kominote a bezwen plis moun tankou Daphnée Durand Campbell –swa sèl fanm ayisyèn ki fè pati chanm depite Eta Florid la.

XS
SM
MD
LG