Accessibility links

Inyon Ewòp la Jwenn Yon Antant Pou Rezoud Kriz Ekonomik Zòn Ewo a

  • VOA Nouvèl

Lidè Inyon Ewopeyè nan nan yon somè ki dewoule nan vil Brussel, nan peyi Beljik (AP Photo/Yves Logghe)

Dirijan 27 eta manm Inyon Ewòp la te reyini pou yo te chache jwenn yon antant sou chanjman yo vle pote nan Trete Ewopeyen an -chanjman ki ta kapab enpoze regleman pi sevè sou politik fiskal chak nasyon.

Delege yo rive jwenn yon antant sou kesyon an nan yon somè ki dewoule nan vil Brussel, nan peyi Beljik; se La Frans ak Lalmay ki te patwone akò a. Anvan sa, premye-minis britanik la, David Cameron, te egzije kèk konsesyon ke Paris ak Berlin pat soti pou yo fè.

Konsa, akò yo jwenn nan konsène sèlman 17 eta ki itilize ewo a kòm lajan yo, ak tout lòt peyi ki ta vle aplike sa k di nan dokiman an. Kant-a-pou la Grand Bretay –ki genyen lajan pa li, liv sterling nan-- misye Cameron te di li pap patisipe nan aplikasyon akò a.

Li pale pou l di:

"Enterè Lagrand Bretay nan Inyon Ewòp la –ki se kenbe mache yo ouvè, lib echanj, lavant pwodui ak sèvis daprè règleman nou kapab kontwole-- tou sa se bagay ki pwoteje, yo pa chanje. Men, nouvo seri diskisyon sa yo k ap fèt sou entegrasyon ak pouvwa espesyal, mande pou n renonse a souverènte nou kòm nasyon si yon peyi vle antre nan zòn ewo a, eben, nou kapab aplike chanjman sa yo andeyò Trete sou Inyon Ewòp la. Alòs, nou pa pral soumèt nouvo ako sa a devan palman nou an ; Lagrand Bretay pa ladann."

Bò kote pa l, prezidan fransè a, Nicolas Sarkozy, te pale pou l di delege yo ta pi renmen jwenn yon antant ki gen patisipasyon tout manm Inyon Ewòp la; sepandan, daprè li, egzijans Lagrand Bretay yo pa akseptab.

Gouvènè Bank Santral Ewopeyèn nan, Mario Braghi, reyaji pou l di akò eta manm Inyon Ewòp la jwenn jodiya se yon bon antant pou « zòn ewo a » e sa kapab ede peyi yo rezoud pwoblèm ekonomik y ap konfwonte jounen jodiya.

XS
SM
MD
LG