Accessibility links

Breaking News

Lachin Rapòte Kantite Ka Maladi Kowonaviris nan Peyi a Rive nan 60 Mil


2 abitan vil Peken, kapital Lachin, ki mete mask nan figi yo pou yo pwoteje tèt yo kont maladi COVID-19 la ou kowonaviris. (Foto: AP/Ng Han Guan, 13 fevriye 2020).

Nan Lachin -pi presizeman nan pwovens Hubei, ki nan sant peyi a-- otorite yo fè konnen plis pase 254 lòt moun mouri anba epidemi COVID-19 la (kowonaviris la) e yo anonse yon gwo ogmantasyon nan nouvo ka yo. Nan Hubei (pwovens kote epidemi an te eklate sa gen 2 mwa, yon epidemi ki deja touye mil 367 moun atravè tout peyi a), responsab sante yo di yo chanje metòd deteksyon an ki, jiske la, sete yon tès laboratwa, pou yo sèvi kounyela a avèk òdinatè pou yo analize kò moun yo avèk yon skanè. Nouvèl ki pale de nouvo ka lanmò yo ak plis enfekyon an tonbe yon jou aprè Lachin te fè konnen kantite nouvo ka yo te bese pou yon 2èm jounen youn apre lòt.

Chanjman ki fèt nan teknik deteksyon an pèmèt responsab yo dekouvri ke kantite ka moun ki malad yo pi wo atravè Lachin, swa anviwon 60 mil moun enfekte, tandiske nan pwovens Hubei responsab yo anrejistre yon ogmantasyon de 15 mil moun nan kantite reyèl la pou bay yon total ki depase 48 mil, tandiske kantite moun ki mouri nan pwovens la monte rive 242.

Nan yon ayewopò nan Peyi Endonezi, responsab lasante yo ap pare pou yo teste pasaje k ap debake pou konnen si yo pa deja trape maladi COVID-19 la (kowonaviris).
Nan yon ayewopò nan Peyi Endonezi, responsab lasante yo ap pare pou yo teste pasaje k ap debake pou konnen si yo pa deja trape maladi COVID-19 la (kowonaviris).

Pòtpawòl OMS la (Òganizasyon Mondyal Lasante), Tarik Jasarevic, ki t ap bay ajans nouvèl REUTERS yon entèvyou jedi 13 fevriye a, fè konnen ogmantasyon nan kantite nouvo ka yo se yon siyn ki montre ke dyagnostik epidemi kowonaviris la dwe gen yon nouvo definisyon ki pi elaji; se konsa OMS ta renmen pou Lachin ofri plis klate, plis transparans sou nouvo metòd l ap itilize pou l idantifye e konfime nouvo ka malad yo. Yon lòt kote, daprè direktè pwogram sante dijans OMS la, Michael Ryan, ki pale ak laprès nan vil Jenèv jedi 13 fevriye a, ogmantasyon kantite moun ki malad yo “pa vle di gen yon chanjman enpòtan nan evolisyon epidemi an”, men pito se “yon chanjman nan fason yo rapòte ka yo.”
Nan menm jounen jedi a, Sant Ameriken pou Kontwòl ak Prevansyon Maladi a (CDC) anonse responsab yo konfime yon 15èm ka maladi COVID-19 la Ozetazini. Moun sa a, avèk lòt sitwayen ameriken yo te rapatriye sa pa gen lontan, te debake nan baz ayeryèn San Antonio a, nan Eta Tegzas, nan dat vandredi 7 fevriye pase a abò yon avyon charter ki te sòti nan Lachin e ke Depatman Deta a te lwe. Malad sa a ap swiv trètman nan yon lopital nan rejyon an. CDC pibliye yon deklarasyon kote li fè konnen: “Nan jou ak semèn k ap vivni yo, li posib pou responsab yo dekouvri plis ka maladi toujou; pami yo ap genyen lòt moun ki te sòti sa pa gen lontan nan vil Wouhann, nan Lachin.”

Pandansetan pasaje ki te abò bato de kwazyè M.S. Westerdam ki te bloke depi 2 semèn nan Gòlf Tayland la, ap selebre apre yo fin resevwa yon bòn nouvèl yo t ap tan depi lontan. Finalman bato a rive nan Kanmbòdj kote li jwenn pèmisyon pou l akoste nan pò vil Sihanoukville apre 4 peyi (Japon, Taylann, Taiwann ak Filipin) te refise resevwa li paske otorite peyi sa yo te pè pou youn oubyen plis nan pasaje yo pa deja trape viris COVID-19 la. Yon ekip doktè ak lòt pèsonèl medikal monte abò bato a pou yo fè tès sou tou lè mil 455 pasaje yo ak 802 manm ekipaj yo anvan pou moun sa yo jwenn pèmisyon pou yo debake.

XS
SM
MD
LG