15 moun pèdi lavi yo e 14 lòt blese sou wout Nasyonal # 1 nan zòn Twou Fòban (Trou Froban) samdi 12 me 2018 la vè 4 trè nan aprè-midi lè yon tap-tap ki tap soti Mouwi (Montrouis) te al fè kolizyon nan yon viraj ak yon kamyon ki tap pote machadiz e ki tap soti nan direksyon opoze.
Yo te kouri ak moun ki blese yo nan lopital ki pi pre yo nan Akayè ak nan Sen Mak pou n site yon nòt Ministè Enteryè ak Kolektivite Teritoryal pibliye kote otorite gouvènmantal yo deplore aksidan an.
An menm tan tou, ministè a felisite Brigadye Pwoteksyon Sivil, anbilayse yo ak Polis Nasyonal la, ak lòt otorite lokal ki pat pèdi tan pou te vin pote viktim yo sekou, epi relouvri sikilasyon sou wout Nasyonal #1 an ki relye nò peyi a ak Kapital la. Nan menm nòt la, Ministè Enteryè, voye senpati li bay fanmi moun ki mouri e sila yo kap resevwa swen nan lopital apre ensidan regretab sa a.