Lapolis zile Fiji deklare yo mande lame vinn ede yo sekirize peyi a apre yon eleksyon sere sere semèn pase a ke kandida ki pèdi a konteste.
Se yon devlopman ki bay gwo kè sote nan peyi sila a ki sitye nan oseyan Pasifik la kote demokrasi a frajil. Fiji sibi 4 kou deta militè pandan 35 ane ki pase yo.
2 Prensipal kandida pou pòs premye minis la ane sa a, se moun ki te dirije kou deta nan pase a.
Lame a pran mezi pou sekirize peyi a apre pati Fiji an Premye -- Premye Minis Frank Bainimarama a te derefize aksepte defèt li, malgre rival li Sitiveni Rabuka ak 2 lòt pati te anonse yo fòme yon kowlisyon ki ba yo majorite nan palman an e ke se kandida pa yo ki pral dirije pwochen gouvènman peyi a.
