ETAZINI-ELEKSYON —
Demokrat Hillary Clinton ranmase kounye a plis pase 2 milyon vòt anplis Prezidan eli Donald Trump, ki ranpòte kous pou Mezon Blanch la, nan eta kote li te enpòtan pou l genyen, e ki te ba l ase vòt electoral pou l tounen 45èm chef ekzekitif peyi a.
Pandan kontaj vòt ap kontinye nan kèk eta tankou Kalifòni, Madan Clinton pran avantaj Jodi a ak 2 milyon 17 mil 563 vòt popilè.
Sepandan, kèlkeswa avans ke vòt popilè yo ta bay Madan Clinton lè yo fin konte nèt, sa pa pwal chanje rezilta eleksyon 8 novanm nan.
Hillary Clinton pwal tounen 5èm kandida prezidansyèl nan istwa Etazini e 2èm nan 16 lane pase yo, ki genyen vòt popilè yo men pèdi eleksyon an paske se sistèm Kolèj Elektoral la ki eli prezidan peyi a dapre konstitisyon an depi 2 syèk.