Accessibility links

Breaking News

Etazini-Prezidansyèl: Yon lòt Deba ant Kandida Demokrat yo, Hillary Clinton ak Bernie Sanders.


Kandida pou nominasyon Pati Demokrat la, Hillary Clinton ak Bernie Sanders.

Ozetazini, 2 kandida pou nominasyon pati demokrat la pou pòs prezidan an, Hillary Clinton ak Senatè Bernie Sanders, tope kòn yo nan yon deba ki dewoule nan sware dimanch 6 mas 2016 la, nan vil Flint, nan Eta Michigan. Madam Clinton di piblik la, si se li ki ranpòte nòminasyon an, li pare pou l fè fas ak Donald Trump, milyadè ki devan nan kous pou nominasyon pati republiken an. Li deklare:

“ Mwen panse lespri fanatik, lespri vatangè, karaktè vyolan Donald Trump pa pral fè pèp ameriken an plezi.”

Anvan deba a te dewoule, tou lè 2 kandida yo te vizite vil Flynt kote 100 mil moun te gen pou fè fas ak yon dlo kontamine; e otorite vil la, Eta Michigan ak gouvènman federal la gen lontan depi y ap eseye rezoud pwoblèm sa a. Kandida Sanders pat ezite di sa l panse sou dosye sa a:

“Sa m te tande ak sa m te wè frape m seryezman; mwen pa kapab kwè, nan vil Flynt, Ozetaini, nan ane 2016, ou ka jwenn timoun ki anpwazonnen konsa. Se pa konnen bagay yo ta dwe ye nan peyi nou an.”

Hillary Clinton ak Bernie Sanders twoke lide tou sou kesyon tankou komès entènasyonal, kontwòl zam, ak refòm nan finansman kanpay elektoral. Eta Michigan pral òganize eleksyon primè li madi 8 mas 2016 la; dènye sondaj yo montre Madam Clinton gen yon avans 53% kont 47% sou Misye Sanders.

XS
SM
MD
LG